हुन्डाई क्रेटा र भेन्यु : बने सबैभन्दा बढी बिक्री हुने एसयूभी र कम्प्याक्ट एसयूभी

हुन्डाई क्रेटा र भेन्यु भारतीय बजारमा धेरै बिक्री हुने एसयूभीको रुपमा पहिचान कायम गरेका छन् । अप्रिल महिनाको बिक्री तथ्यांकमा एसयूभीमा क्रेटा र कम्प्याक्ट एसयूभीमा भेन्युले सबैभन्दा बढी बिक्री हुने कारको रेकर्ड कायम गरेका छन् ।

गत एक वर्ष देखि नै क्रेटाले बिक्रीमा नम्बर १ रेकर्ड कायम गरिरहेको छ । कोभिड–१९ संकटको समयमा पनि यसको बिक्री लगातार राम्रो रुपमा भइरहेको छ । अप्रिल महिनामा केही गिरावट आए पनि समग्र बिक्रीमा यसले राम्रै पहिचान कायम गरेको छ ।

अप्रिल महिनामा भारतमा १२ हजार ४६३ युनिट क्रेटा बिक्री भएको छ । यो भन्दा पहिले मार्च महिनामा १२ हजार ६४० युनिट क्रेटा बिक्री भएको थियो ।

गत वर्षको कोभिड–१९ पहिले क्रेटा लन्च गरिएको थियो । त्यस पश्चात तीन पटक सम्म यसको मूल्य वृद्धि भइसकेको छ । तर मूल्यले यसमा केही असर पारेको छैन ।

नेपाली बजारमा समेत क्रेटा उपलब्ध छ । हाल नेपाली बजारमा हुन्डाई क्रेटाको मूल्य ४५ लाख ५६ हजार देखि ७४ लाख ९६ हजार रुपैयाँ सम्म छ ।

त्यसैगरी हुन्डाईको अर्को लोकप्रिय सबकम्प्याक्ट एसयूभी भेन्यु अप्रिल महिनामा सबैभन्दा बढी बिक्री भएको छ । अघिल्लो महिना १० हजार ७२२ युनिट बिक्री भएको भेन्यु अप्रिल महिनामा ११ हजार २४५ युनिट बिक्री भएको थियो ।

दोस्रो नम्बरमा रहेको सुजुकी ब्रेजा भन्दा भेन्यु २५ युनिट मात्र बढी बिक्री भएको हो । यो भन्दा पहिले लगातार ब्रेजा पहिलो नम्बरमा रहेको थियो ।

नेपाली बजारमा भेन्युको मूल्य ३६ लाख २६ हजार देखि ५० लाख ५६ हजार रुपैयाँ सम्म छ ।