ह्याकरले टाढैबाट खोले टेस्ला कारको ढोका, पाए ३१,५०० डलर

साइबर अनुसन्धानकर्मी राफल फिलिप र बेनेडिक्ट स्मोजलले टेस्लाको ‘मोडल एक्स’ कारमा कमजोरी रहेको पत्ता लगाएका छन् । उनीहरुले दुई वटा ड्रोन र वाईफाई डंगोलको सहयोगले पार्किङमा राखेको टेस्ला कारको ढोका खोल्न सफल भएका छन् ।

यद्यपि यो घटना अहिलेको होइन । उनीहरुले गत वर्षको अक्टोबरमै यो कमजोरी पत्ता लगाएका थिए । टेस्लाले उनीहरुलाई पुरस्कृत समेत गरेको र उक्त कमजोरी समाधान गरी नयाँ भर्सनको सफ्टवेयर अपडेट उपलब्ध गराइसकेको जनाएको छ । उनीहरुले यसवापत ३१ हजार ५ सय डलर प्राप्त गरेकोे बताएका छन् ।

यो कुराको जानकारी हालै सम्पन्न क्यानसेक वेस्ट कन्फ्रेन्समा सार्वजनिक गरिएको हो । उनीहरुले वाइफाईको माध्यमबाट यो कार्य गरेको र यसलाई टीबोन ह्याक नाम दिइएको बताएका छन् ।

उनीहरुले नेटवर्क कनेक्सन म्यानेज गर्ने इन्टेलको ओपन सोर्स सफ्टवेयर कोन म्यानमार्फत रोडमा कुदिरहेको टेस्ला गाडीको ढोका खोल्न सफल भएका हुन् । यतिसम्म कि उनीहरुले सिटको पोजिसन परिवर्तन गर्नेसम्मको काम ड्रोनबाटै गर्न सफल भए ।

उनीहरुका अनुसार ड्रोनबाटै एउटा ड्राइभरले कन्सोलमा रहेको बटन चलाएर जे गर्न सक्छ, त्यो सबै ड्रोनबाटै गर्न सकिने खालको कमजोरी फेला पारेका हुन् ।