आईएमई ग्रुप अटोमोटिभ डिभिजनको सीईओमा अब हेमन्त पुरानिक

काठमाडौं – आईएमई ग्रुप, अटोमोटिभ डिभिजनको सीईओमा हेमन्त पुरानिक नियुक्त भएका छन् । आईएमई ग्रुप अन्तर्गत आईएमई मोटर्स, आईएमई अटोमोटिभ्स र एलटी इन्जिनियरिङ सर्भिसेज पर्छन् ।

नेपाली अटोमोबाइल उद्योगमा बढ्दो सम्भावनालाई दृष्टिगत गरी आगामी दिनमा आक्रामक कदम चाल्ने लक्ष्य लिएको र सीईओको रुपमा पुरानिकको नियुक्ति पनि एक भएको आईएमई ग्रुपले जनाएको छ ।

हेमन्त पुरानिकसँग अटोमोबाइल क्षेत्रमा २४ वर्ष भन्दा लामो अनुभव छ । समग्र अटोमोबाइल उद्योगलाई कसरी अगाडि बढाउने र यसको सञ्चालन कसरी गर्ने भन्ने वारेमा उनले धेरै योजनामूलक कार्यहरु गरेका छन् ।

हेमन्त पुरानिकले टाटा मोटर्समा करिव २३ वर्ष काम गरेको अनुभव छ । उनले ११ देशमा विभिन्न भूमिकामा कार्य गरेका छन् । नेपालमा उनले टाटा मोटर्सको प्यासेन्जर भेइकल क्षेत्रमा कार्य गरेका थिए । उनको कार्यकालमा आक्रामक व्यवस्थापन शैली र नवीन बजार रणनीति अपनाइनुका साथै विभिन्न नयाँ मोडलका गाडी लन्च गरिनुका साथै नेटवर्क विस्तारमा समेत विशेष कार्य भएका थिए । उनकै कार्यकालमा टाटा मोटर्सले नयाँ ग्राहक खोजी गर्नुका साथै बजार हिस्सा समेत वृद्धि गर्न सफल भएको थियो । भारतमा टाटा अल्ट्रोज प्रिमियम ह्याचब्याक लन्च गर्नमा समेत उनको महत्वपूर्ण भूमिका थियो ।

त्यसपछि उनले नेपालमा ‘दीगो’ ब्रान्डका इलेक्ट्रिक गाडी उपलब्ध गराइरहेको दीगो ग्रुप अफ कम्पनिजमा सीईओ बने । करिव डेढ वर्षको अवधिमा उनको निर्देशनमा बनेको सही दिशाले छोटो समयमै दीगो एक परिचित ब्रान्ड बन्न सफल भएको छ । उनकै नेतृत्वका कारण नै पहिलो केही लटमा आएका सबै गाडी सोल्ड आउट भइसकेका छन् ।

अब हेमन्त पुरानिक नयाँ जिम्मेवारीका साथ आईएमईमा प्रवेश गरेका छन् । अटोमोबाइल क्षेत्रलाई प्यासन मान्ने र टिममा रहेर काम गर्न रुचाउने पुरानिकले आगामी दिनमा समेत सफलतापूर्वक कार्य गर्ने अपेक्षा गरेको बताएका छन् ।

आईएमई ग्रुप अन्तर्गत हाल अशोक लेल्यान्ड, यूएम, हार्ले डेभिडसन, एस्कर्ट्स आदि ब्रान्डको कारोबार भइरहेको छ ।