भल्वोले २०३० देखि इलेक्ट्रिक कार मात्र उत्पादन गर्ने, अनलाइनबाट बिक्री गरिने

सन् २०३० देखि भल्वो कम्पनीले इलेक्ट्रिक कार मात्र निर्माण गर्ने घोषणा गरेको छ । चीनको स्वामित्वमा रहेको भल्वो कार प्रिमियम कार निर्माता कम्पनीमा समावेश रहेको छ । कम्पनीले चाँडै नै पेट्रोल र डिजेल भेरिएन्टको कार बन्द गर्ने योजना बनाइरहेको छ ।

स्वीडेनको प्रमुख कार निर्माता कम्पनी भल्वोले २०२५ सम्ममा ५० प्रतिशत बजार हिस्सा इलेक्ट्रिक कारले ओगट्ने जानकारी दिएको छ । भल्वो कम्पनीले केही वर्षमा इलेक्ट्रिक कार लन्च गर्ने भएको छ । कम्पनीले सो कार अललाइनबाट मात्र बिक्री गर्नेछ ।

कम्पनीले हालै पहिलो मोडल सी४० फुल इलेक्ट्रिक एसयूभी सार्वजनिक गरेको थियो । सो इलेक्ट्रिक एसयूभीको ब्याट्रीको रेन्ज लगभग ४२० किलोमिटर हुनेछ । कम्पनीले नयाँ इलेक्ट्रिक मोडलको लागि वायरलेस अपग्रेड गर्नेछ ।

फोर्ड मोटरले पनि युरोपमा २०३० सम्ममा आफ्नो सबै कार इलेक्ट्रिक हुने जानकारी दिएको छ । जबकी टाटा मोटर्स समेत सम्मिलित भएको ब्रिटिश अटोमोबाइल कम्पनी ज्यागुअर ल्यान्डरोभरको सबै लक्जरी ब्रान्ड २०२५ सम्ममा इलेक्ट्रिक कार हुनेछ र २०३० सम्ममा सबै कार इलेक्ट्रिक मोडल लन्च गर्नेछ ।

२०२० नोभेम्बरमा जर्मनीको फक्सवागनको स्वामित्वमा रहेको लक्जरी कार निर्माता कम्पनी बेन्ट्लेले पनि सबै मोडल २०३० सम्ममा अल इलेक्ट्रिक हुने घोषणा गरेको छ ।