दशैंमा आपराधिक घटना र सवारी दुर्घटनामा कमि

काठमाडौं– यसपटकको दशैंका मुख्य दिनहरुमा देशैभरी ठूला दुर्घटनाहरु नभएको तथा आपराधिक घटनामा समेत कमी आएको प्रहरी प्रधान कार्यालयले जनाएको छ ।

कार्यालयका अनुसार कोभिड–१९ को महामारीका कारण सवारी साधनका साथै मानिसको आवागमन कम हुँदा आपराधिक घटना तथा दुर्घटना कम भएको हो ।

प्रहरी प्रवक्ता प्रहरी वरिष्ठ उपरीक्षक कुबेर कडायतका अनुसार यसपटकको दशैँको मुख्य पाँच दिनको विवरण हेर्दा ठूलो तथा गाह्रो अवस्था सिर्जना हुने घटना घटेका छैनन् ।

सम्भावित जोखिम क्षेत्र पहिचान गरी आवश्यक मात्रामा प्रहरी र कुकुर तथा ड्रोनसमेतको प्रयोग गरिएकाले पनि त्यस्ता घटना रोक्न सफल भएको उनको भनाइ छ ।

दशैंको मुख्य दिन कात्तिक ७ देखि ११ गतेसम्मको विवरण अनुसार यसपटक जबर्जस्ती करणीका ४ वटा घटना दर्ता भएको छ ।

त्यस्तै कर्तव्य ज्यानका ११, चोरीका १६ घटना दर्ता भएको छ ।

यो अवधिमा ३३४ सवारी दुर्घटना भएका छन् । ती दुर्घटनाका कारण ४३ को मृत्यु भएको र ५१९ जना घाइते भएको प्रहरी प्रधान कार्यालयले जनाएको छ ।

यसका आधारमा दशैंको समयमा सबै घटनाहरु न्युन रहेको प्रहरीले जनाएको हो ।

यो दर्शैमा काठमाडौं उपत्यकामा भने २९४ सवारी दुर्घटनामा ९ को मृत्यु भएको र २७८ जना घाइते भएको छ । अघिल्लो वर्ष ४०० भन्दा बढीको दुर्घटना भएको थियो । त्यसमा १० जनाको मृत्यु र ३१८ जना घाइते भएको थियो ।

अघिल्लो वर्षको दशैंमा घटस्थापनादेखि पूर्णिमासम्म चोरीका ६६ र करणी सम्बन्धीका ५० घटना भएको अभिलेख छ ।

उक्त अवधिमा ७०० सवारी दुर्घटनामा १११ को मृत्यु भएको थियो ।