गत आर्थिक वर्षमा भित्रिए ९ हजार ५२ विद्युतीय सवारी, कुल सवारीको २ प्रतिशत

काठमाडौं – गत आर्थिक वर्ष २०७७/७८ मा नेपाली बजारमा २ सय ६१ युनिट कार, जिप र भ्यान भित्रिएका छन् । भन्सार विभागको तथ्यांक अनुसार यी सवारी साधन चीन, भारत, कोरिया र अमेरिकाबाट भित्रिएका हुन् ।

यो अवधिमा १०० किलोवाट सम्मका चीनबाट ७६, भारतबाट २५ र कोरियाबाट १९ वटा इलेक्ट्रिक कार भित्रिएका छन् । त्यसैगरी ५० देखि १०० किलोवाट सम्मका २५ कार भित्रिएका मध्ये चीनबाट १८ र कोरियाबाट ७ वटा छन् ।

त्यसैगरी १०० देखि १५० किलोवाट क्षमताका चीनबाट ३८ र अमेरिकाबाट १३ इलेक्ट्रिक कार भित्रिएका छन् । १५० देखि २०० किलोवाट क्षमताका चीनबाट ८ र कोरियाबाट ४५ कार, जिप, भ्यान भित्रिए ।

फोर ह्विलर्स विथ वान्ली इलेक्ट्रिक मोटर्स फर प्रोपल्सन भनेर चीनबाट १० र भारतबाट २ युनिट भित्रिएका छन् ।

यो भन्दा पहिले आर्थिक वर्ष २०७६/७७ मा कुल ४८१ विद्युतीय सवारी साधन भित्रिएका थिए ।

यसरी विद्युतीय सवारीसाधन भित्र्याउने कम्पनीमा निसान, टाटा, एमजी, महिन्द्रा र किया रहेका छन् । नेपाली बजारमा यी ब्रान्डका इलेक्ट्रिक चारपांग्रे सवारी साधनको बर्चस्व छ ।

गत आर्थिक वर्षमा समग्रमा ९ हजार ५२ वटा विद्युतीय सवारी साधन आयात भएका हुन् । जुन कुल आयात भएका सवारी साधनको दुई प्रतिशत हो । गत आवमा कुल चार लाख ७८ हजार ७२ वटा गाडी भित्रिएका थिए । विद्युतीय सवारीसाधनमा सबैभन्दा बढी तीन पाङ्ग्रे रहेका छन् ।

विभागका अनुसार गत आवमा ४ हजार ७९७ वटा तीन पांग्रे विद्युतीय सवारी साधन भित्रिएको तथ्याङ्कमा उल्लेख छ । दोस्रो नम्बरमा गत आवमा कुल २ हजार ३३३ वटा इलेक्ट्रिक बाइक र स्कुटर भित्रिएको उल्लेख छ । यसैगरी, सोही अवधिमा १६ सय ६१ वटा विद्युतीय सवारी साधन विमानस्थल तथा उद्योगहरूको प्रयोजनका लागि ल्याइएका छन् ।