थाइल्यान्डको नयाँ प्लान्टबाट बीवाईडीले सार्वजनिक ग-यो ८० लाखौ कार

बीवाईडीले थाइल्यान्ड प्लान्टको उद्घाटन गर्नुका साथै ८० लाख सवारी उत्पादनको माइलस्टोन समेत हासिल गरेको छ । वार्षिक रुपमा १ लाख ५० हजार सवारी उत्पादन गर्न सक्ने क्षमता भएको प्लान्ट निर्माण १६ महिनामै सम्पन्न गरेको बीवाईडीले त्यही प्लान्टबाट ८० लाखौं सवारी साधनको रुपमा बीवाईडी डल्फिन ईभी सार्वजनिक गरेको हो ।

सो अवसरमा थाइल्यान्डका उद्योग मन्त्री पिम्फात्रा वुइचाइकुल र बीवाईडीका अध्यक्ष वाङ चुआन्फु लगायतका अन्य व्यक्तिहरुको सहभागिता रहेको थियो ।

सन् २००८ देखि सवारी उत्पादन थालेको बीवाईडीले सन् २०२१ को मे महिनामा १० लाख सवारी साधन उत्पादनको माइलस्टोन हासिल गरेको थियो । त्यसपछि तीन वर्षकै अवधिमा ८० लाख सवारी साधन उत्पादन गर्न सफल भएको छ ।

बीवाईडी अटोमोटिभ उद्योगमा सन् २००३ मा प्रवेश गरेको थियो र पहिलो न्यु इनर्जी भेइकल २००८ मा बिक्री गरेको थियो । अहिले भने यसले दर्जनौ मोडल बिक्री गर्दै आएको छ ।

बीवाईडीले सन् २०२१ मा १० लाख सवारी साधन उत्पादन गरेको थियो भने त्यसपछिको १८ महिनामै तीनगुणा पु¥याएको थियो । त्यसपछिको ९ महिनामा ५० लाख र फेरि ७ महिनामै ७० लाख उत्पादन पु¥याउन सफल भएको थियो । अहिले पनि लगभग तीन महिनाकै अवधिमा ८० लाख पु¥याएको छ ।

२०२१ को मे महिनामा १० लाख, २०२३ को अगस्टमा ५० लाख, २०२३ नोभेम्बरमा ६० लाख र २०२४ मार्चमा ७० लाख सवारी साधन उत्पादन भएको थियो ।

न्यु इनर्जी भेइकलमा ग्लोबल लिडर बन्दै गरेको बीवाईडीले अन्तर्राष्ट्रिय बजार समेत विस्तार गर्दै गएको छ । सन् २०२३ मा ३३७ प्रतिशत वृद्धि गर्दै बीवाईडीले २ लाख ४३ हजार गाडी निर्यात गरेको थियो । यो वर्षको दोस्रो त्रैमासिकमा पनि १६ लाख भन्दा बढी सवारी विश्वव्यापी रुपमा बिक्री गरी २८ गत वर्ष भन्दा २८ प्रतिशत बढी बिक्री गर्न सफल भएको छ । ती मध्ये २ लाख ३ हजार गाडी अन्तर्राष्ट्रिय बजारमा बिक्री भएका छन्, जुन गत वर्ष भन्दा १७३.८ प्रतिशत बढी हो ।

हाल बीवाईडीका न्यु इनर्जी भेइकल विश्वका ८८ देशमा बिक्री हुन्छन् । थाइल्यान्ड, ब्राजिल, हंगेरी र उज्वेकिस्तानमा बीवाईडीका प्यासेन्जर कार प्रोडक्सन बेस रहेका छन् ।