८ लेनको बन्ने भयो तीनकुने–एयरपोर्ट–तिलगंगा सडकखण्ड

काठमाडौं – चक्रपथ सडक अन्तर्गत तीनकुने–एयरपोर्ट–तिलगंगा सडकखण्ड समेत कोटेश्वर–कलंकी खण्ड जस्तै ८ लेनको बन्ने भएको छ । सडक डिभिजन कार्यालयले यसका लागि विस्तृत परियोजना प्रतिवेदन (डीपीआर) तयार गरिरहेको काठमाडौं डिभिजनका प्रमुख कुबेर नेपालीले जानकारी दिएका छन् ।

२.४ किलोमिटर लामो सो सडकखण्डका लागि टेक स्टुडियो अफ इन्जिनियरिङले २०७७ फागुनदेखि डिजाइनको काम गरिरहेको छ ।

तीनकुने–एअरपोर्ट–तिलगंगा सडकखण्ड सहरी सडकको अवधारणा अनुरुप डिजाइन गरिएको छ र यो ८ लेनको हुनेछ । चार–चार लेनको बीचमा मेडियन हुनेछ । एउटा लेन ३.५ मिटरको हुनेछ । तीनदेखि साढे ३ मिटरको मेडियनमा कोटेश्वर–सूर्यविनायक र तीनकुने–माइतीघर खण्डको जस्तै बोट–विरुवा लगाइनेछ । सडकको दायाँबायाँ एक/एक सर्भिस लेन हुनेछ ।

सर्भिस लेन र मुख्य लेनकाबीचमा विद्युत्का तार, टेलिफोन, इन्टरनेट र केबल, ढल तथा खानेपानीलगायत युटिलिटिजका तार र पाइप अन्डरग्राउन्ड गर्ने ठाउँ छोडिनेछ ।

सो सडक खण्ड आगामी आर्थिक वर्षमा निर्माण शुरु गर्ने लक्ष्यका साथ काम भइरहेको बताइएको छ ।

साढे २७ किलोमिटर लामो चक्रपथको एउटा खण्ड नेपाल आफैले बनाउने रणनीतिअनुसार तीनकुने–एयरपोर्ट–तिलगंगा खण्डको डीपीआर तयार पारिएको हो । सन् १९७७ मा चीनकै सहयोगमा चक्रपथ निर्माण गरिएको थियो ।

यद्यपि विभिन्न निकायसँग समन्वय गर्ने कार्य चुनौतीपूर्ण रहेको र यसको लागि आवश्यक प्रक्रिया समेत अगाडि बढाइएको सडक डिभिजन कार्यालयको भनाइ छ ।