नेपालमा बेनेलीको पहिलो स्कुटर प्यानेरिया १२५ : यस्ता छन् ८ विशेषता

नेपाली बजारमा केटीएम इन्टरनेसनलले बेनेली ब्रान्डका मोटरसाइकल र स्कुटर बिक्री–वितरण गरिरहेको छ । कम्पनीले केही दिन पहिले मात्र नेपाली बजारमा बेनेलीको नयाँ स्कुटर प्यानेरिया १२५ भित्र्याएको हो । यसमा ईएफआई अर्थात इलेक्ट्रोनिक फ्युल इन्जेक्सन सहितको इन्जिन छ ।

प्यानेरिया १२५ ईएफआई एड्भान्स्ड मोडर्न फिचरले भरिएको क्लासिक लुकमा उपलब्ध नियो–रेट्रो कम्बिनेसनको स्कुटर हो । बेनेलीको उक्त स्कुटरका विभिन्न विशेषताहरु यहाँ उल्लेख गरिएको छ ।

नियो रेट्रो ड्यासबोर्ड
यसमा डिजिटल डिस्प्ले र भर्चुअल ओडोमिटर भएको एनालग र डिजिटल दुवै प्रकारको नियो–रेट्रो ड्यासबोर्ड छ । यसमा ट्रिप मिटर, एमपीएच तथा केएमपीएच रिडिङ, फ्युल लेवल, टाइम, इन्जिन वार्निङ ल्याम्प आदि उपलब्ध छ ।

सस्पेन्सन र ब्रेकिङ
राइडरहरुको सुरक्षालाई ध्यानमा राखेर यसमा त्यसै अनुसारको सस्पेन्सन र ब्रेकिङको व्यवस्था गरिएको छ । ९० एमएम ट्राभल सहितको फ्रन्ट टेलिस्कोपिक फोर्क्स र ७२ एमएम ट्राभल सहितको रियर स्प्रिङ क्वाइल आयल ड्याम्पन्ड सस्पेन्सन रहेको छ । यसको अघिल्लो भागमा ड्युअल पिस्टन क्यालिपर सहितको १९० एमएम फ्रन्ट डिस्क ब्रेक र पछिल्लो भागमा १३० एमएमको ड्रम ब्रेक छ ।

ह्विल साइज
यसमा बेस्ट इन क्लास १२ इन्च आल्मुनियम ह्विल रहेको छ । जसमा १००÷९०–१२ र ११०÷९०–१२ ट्युबलेस टायर छ । यसमा भएको ह्विल र टायर कम्बिनेसनले रेट्रो स्टाइलमा थप स्लिक टच प्रदान गरेको छ । यसबाट नेपाली सडकको अवस्था अनुसार यसलाई सहज तरिकाले चलाउन सकिन्छ ।

इन्जिन र ट्रान्समिसन
यसमा ईएफआई अर्थात इलेक्ट्रोनिक फ्युल इन्जेक्सन सहितको नोवल सिंगल सिलिन्डर एयरकुल्ड १२४ सीसीको फोर स्ट्रोक, एयरकुल्ड, सिंगल सिलिन्डर इन्जिन छ, जसले ७५०० आरपीएममा ८.५ पीएसको पावर र ६००० आरपीएममा ९.२ एनएम टर्क जेनेरेट गर्छ । यसबाट सबै स्थानमा आरामदायी तरिकाले यात्रा गर्न सहज हुन्छ ।

सिट र स्टोरेज
इटालियन रेट्रोको लुक र स्टाइललाई थप पहिचान दिनका लागि यसको सिटलाई कन्ट्रास्टिङ लेदर फिनिस दिइएको छ । यसमा १२ लिटरको अन्डरसिट स्टोरेज छ भने ४.६ लिटरको इन्धन ट्यांकी छ । यसले ४५ देखि ५० किलोमिटर सम्मको माइलेज दिने कम्पनीको दाबी छ ।

किल स्विच र हजार्ड लाइट
विभिन्न प्रकारको ट्राफिक कन्डिसनमा इन्जिन अफ गर्नका लागि यसमा किल स्विच उपलब्ध गराइएको छ भने इमर्जेन्सीको समयमा प्रयोग गर्नका लागि हजार्ड लाइट समेत उपलब्ध छ ।

कम्प्लिट एलईडी लाइट सेट
नेपाली बजारमा पुरै एलईडी लाइट सेट भएको यो पहिलो स्कुटर भएको कम्पनीले बताएको छ । डीआरएल, इन्डिकेटर, ब्रेक लाइट आदि सबै एलईडीयुक्त लाइट छ ।

कलर अप्सन र मूल्य
प्यानेरिया १२५ ईएफआई स्कुटर ह्वाइट, ब्ल्याक, ब्लु र येल्लो गरी विभिन्न चार कलरमा उपलब्ध छ भने यसको मूल्य ३ लाख ३४ हजार ९ सय रुपैयाँ तोकिएको छ ।