एउटै बाइकमा ६० हजार र अन्यमा समेत घटेको मूल्यका कारण चर्चामा बेनेली

काठमाडौं – बजेट पश्चात विभिन्न कम्पनीका बाइकहरुको मूल्य घट्ने क्रम चलिरहेको छ । केही दिन पहिले यो क्रमलाई बेनेलीले समेत निरन्तरता दियो ।

बेनेलीको नेपालका लागि आधिकारिक वितरक केटीएम इन्टरनेसनल ट्रेडिङले गत साता विभिन्न मोडलका बाइक र स्कुटरको मूल्य समायोजन गर्दै नयाँ मूल्य सार्वजनिक गरेको थियो ।

यी मध्ये बेनेलीको टीआरके २५१ मोडलको बाइकमा एकै पटक ६० हजार रुपैयाँले कमी गरिएको छ । नयाँ बजेट, नयाँ मूल्य भनेर बेनेलीले नयाँ मूल्य सूची सार्वजनिक गरेको थियो ।

यो बाइकको मूल्य पहिले ८ लाख २४ हजार ९ सय भएकोमा अब ७ लाख ६४ हजार ९ सय पुगेको छ ।

त्यसैगरी १८० एस र १८० एस नियोन दुवैको मूल्यमा २५ हजार रुपैयाँ कमी गरिएको छ । यी बाइकको मूल्य अब क्रमशः ४ लाख २९ हजार ९ सय र ४ लाख ३९ हजार ९ सय रुपैयाँ भएको छ ।

नेपाली बजारमा उपलब्ध बेनेलीको स्कुटर पेनेरिया १२५ को मूल्यमा समेत ३५ हजार रुपैयाँ कमी गरिएको छ । अब सो स्कुटरको मूल्य २ लाख ९९ हजार ९ सय रुपैयाँ भएको छ ।

बेनेलीका यी बाइक र स्कुटर फाइनान्स तथा एक्सचेन्ज सुविधाहरुमा समेत उपलब्ध हुने कम्पनीको भनाइ छ ।