वैशाख महिनामा भित्रिए ५०४ विद्युतीय कार, १० महिनामा २ हजार ९५५

काठमाडौं – गत बैशाख महिनामा नेपालमा ५०४ विद्युतीय कार भित्रिएका छन् । भन्सार विभागको तथ्यांक अनुसार एक महिनामै यति धेरै विद्युतीय कार भित्रिएका हुन् । यो भन्दा पहिले चैत सम्म २ हजार ४५१ विद्युतीय कार भित्रिएका थिए ।

चालु आर्थिक वर्षको साउनदेखि बैशाखसम्मको १० महिनामा २ हजार ९५५ वटा विद्युतीय कार आयात भएको छ। १० महिनाको अवधिमा ८ अर्ब ४१ करोड ६४ लाख रुपैयाँ मूल्य बराबरका २ हजार ९५५ वटा विद्युतीय कार आयात भएको हो। आयात भएका सो संख्यामध्ये सबैभन्दा धेरै १ सय किलोवाटसम्म मोटर क्षमताका विद्युतीय कार छन्।

१० महिनामा भारतबाट सबैभन्दा धेरै विद्युतीय कार आयात भएको तथ्यांक छ। आयात भएका सबैभन्दा धेरै १ सय किलोवाटसम्म मोटर क्षमता भएका विद्युतीय कार हुन्।

१ सय किलोवाट क्षमतासम्म मोटर भएका २ हजार ८८२ वटा विद्युतीय कार आएका छन्। १ सयदेखि २ सय किलोवाटसम्म ६६ वटा र २ सय किलोवाटभन्दा माथिका ७ वटा विद्युतीय कारछन्।

सरकारले चालु आर्थिक वर्षको बजेटमार्फत् १०० किलोवाटभन्दा माथिको विद्युतीय गाडीको अन्तशुल्क लाग्ने व्यवस्था गरेको छ । यसअघि विद्युतीय गाडीमा अन्तशुल्क लाग्ने व्यवस्था थिएन । तर, यो वर्षको बजेटमार्फत् तत्कालीन अर्थमन्त्री जनार्दन शर्माले अन्तशुल्क र भन्सार करमा वृद्धि गरेको घोषणा गरेका थिए । जसले गर्दा १०० किलोवाटमाथिको जिप, कार र भ्यान आयातमा निकै प्रभाव परेको छ ।