एक वर्षमा ५० देशमा ५० हजार ट्रायम्फ बाइक बिक्री, ल्यायो अफर

भारतमा ट्रायम्फ स्पिड ४०० बाइक लन्च भएको एक वर्ष पुगेको छ । सो अवसरमा कम्पनीले १० हजार मूल्य छुट सहित आकर्षक अफर घोषणा गरेको छ ।

सन् २०२३ को जुन २७ मा ट्रायम्फ स्पिड ४०० बाइक लन्च भएको थियो । त्यसैगरी अक्टोबरमा स्क्र्याम्बलर ४००एक्स लन्च भएको थियो ।

बजाजको सहकार्यमा ट्रायम्फको सो सबैभन्दा सानो बाइक लन्च भए पश्चात धेरै नै चर्चित बन्यो । एक वर्षको अवधिमा ट्रायम्फले विश्वका ५० देशमा ५० हजार बाइक बिक्री गरेको छ ।

नयाँ ट्रायम्फ स्पिड ४०० पूर्ण रूपमा भारतमा निर्मित बाइक हो । जसको कारण कम्पनीले सो बाइक कम मूल्यमा लन्च गर्न सक्षम भएको हो । सो बाइकको हार्ले डेभिडसन एक्स४४०, रोयल इन्फिल्ड क्लासिक ३५०, मेटियोर ३५० र येज्दी रोडस्टरसँग प्रतिस्पर्धासँग हुनेछ । साथै जावा ४२ बाइकलाई पनि टक्कर दिनेछ ।

ट्रायम्फ स्पिड ४०० मा कम्पनीले आकर्षक स्ट्रिट फाइटर डिजाइन दिएको छ । यद्यपि कम्पनीले यसमा राउण्ड हेडल्याम्प, टियरड्रप फ्युल ट्यांक र रेट्रो रियर भ्यू मिरर जस्ता पुरानो लुक कायम राखेको छ । बाइकको अगाडि अपसाइड डाउन टेलिस्कोपिक फोर्क सस्पेन्सन र रियरमा मोनोसक सस्पेन्सन सेटअप दिइएको छ ।

सो बाइक नयाँ डिजाइनको पेरिमिटर फ्रेममा आधारित छ । बाइकको अलोय ह्विल र इन्जिनमा म्याट ब्ल्याक पेन्ट गरेको छ । कम्पनीले यसमा डिजिटल डिस्प्लेसहित एनालग इन्स्ट्रयुमेन्ट क्लस्टर प्रयोग गरेको छ ।

नयाँ ट्रायम्फ स्पिड ४०० मा कम्पनीले ३९८ सीसी सिंगल सिलिन्डर इन्जिन प्रयोग गरेको छ । यो इन्जिनले ८००० आरपीएममा ४० बीएचपी पावर र ६५०० आरपीएममा ३७.५ एनएम टर्क जेनेरेट गर्छ । यसको इन्जिन ६ स्पिड गियरबक्ससँग जोडिएको छ । यसमा स्लिपर असिस्ट क्लच पनि छ । सो बाइकले २८ किमी प्रति घन्टाको माइलेज दिने कम्पनीको दाबी छ ।

सेफ्टी फिचरको लागि बाइकमा ड्युअल डिस्क ब्रेक, ड्युअल च्यानल एबीएस र इन्जिन इमोबिलाइजर दिइएको छ । बाइकमा सबै लाइट एलईडीमा दिइएको छ । यसमा १७ इन्च एलोय ह्विलको साथमा ड्युअल पर्पज रेडियल टायर जोडिएको छ ।