चार्जिङ स्टेशन विस्तार गर्दै हुन्डाई, पुग्यो ४० चार्जिङ स्टेशन

काठमाडौं – नेपालका लागि हुन्डाईको आधिकारिक वितरक लक्ष्मी इन्टरकन्टिनेन्टल प्रालिले इलेक्ट्रिक गाडीका लागि देशभर चार्जिङ स्टेशन विस्ता गर्ने कार्यलाई निरन्तरता दिइरहेको बताएको छ । कम्पनीले नेपाली इलेक्ट्रिक सवारी बजारलाई प्रोत्साहन गर्नका लागि विभिन्न स्थानमा चार्जिङ स्टेशन निर्माण गरिरहेको र हाल यसको संख्या ४० पुगेको बताएको छ ।

नेपाली बजारमा हुन्डाईका इलेक्ट्रिक कार बढ्दै गएका छन् । सो सन्दर्भमा ईभी पूर्वाधारमा समेत लगानी गर्नुपर्ने अवस्थालाई मध्यनजर गरी कम्पनीले विभिन्न स्थानमा यस्ता स्टेशन निर्माण गर्ने र लामो दुरीको यात्रालाई समेत सहज बनाउने उद्देश्य लिएको छ । यसबाट ग्राहकले आफ्नो ईभी अनुभवलाई समेत निखार्ने मौका प्राप्त गर्ने कम्पनीले विश्वास गरेको बताएको छ ।

देशभर विभिन्न स्थानमा इन्धन भर्नका लागि पेट्रोल पम्पहरु भए पनि चार्जिङ स्टेशन भने पर्याप्त मात्रामा छैनन् । हुन्डाईले पुराना तथा नयाँ ग्राहकले सहज तरिकाले मोबाइल फोन चार्ज गरे जस्तै तरिकाले चार्ज गर्न सकिने गरी यस्ता स्टेशन निर्माण गर्ने बताएको छ ।

देशभर स्थापना गरिएका यी ४० चार्जिङ स्टेशन वाहेक निकट भविष्यमै अन्य स्थानमा समेत यस्ता स्टेशन थप्दै जाने योजना रहेको कम्पनीले बताएको छ ।

नेपाली बजारमा हाल हुन्डाईका कोना र कोना फेसलिफ्ट इलेक्ट्रिक कार उपलब्ध छन् भने केही दिनमै आयोनिक ५ समेत लन्च हुँदैछ ।

लक्ष्मी इन्टरकन्टिनेन्टलले हाल देशभर १२ डिलरसिप र १८ सर्भिस सेन्टरमार्फत सेवा प्रदान गरिरहेको छ । विश्वका ५ प्रमुख अटोमोबाइल निर्माता मध्ये हुन्डाई पनि एक हो । विश्वभरका लाखौ ग्राहकले हुन्डाई गाडी प्रयोग गरिरहेका छन् ।