एक महिनामै ३०० ओमोडा ई फाइभ बुकिङ, नेपाली ग्राहकले पाउन थाले गाडी

काठमाडौं – ओमोडा गाडीको आधिकारिक वितरक एसपीजी अटोमोबाइल्स प्रालिले ओमोडा ई फाइभ (ई५) गाडीको डेलिभरी नेपालमा सुरु गरेको छ । गत सन् २०२४ को फेब्रुअरी २ मा नेपालमा सार्वजनिक गरिएको गाडीको औपचारिक बुकिङ्ग सोही दिनमै खुला गरिएको थियो ।

उक्त पहिलो चरणमा बुकिङ गर्ने ग्राहकहरुको गाडी हस्तान्तरण यस महिनाबाट सुरु भएको छ ।
ओमोडा ई फाइभमा अत्याधुनिक प्रविधिलाई ध्यानमा राख्दै बनेको ६१ किलोवाटको उर्जा क्षमता (इनर्जि क्यापासिटी) भएको लिथियम आइरन फस्फेट ब्लेड ब्याट्री प्रयोग गरिएको छ । जसले गर्दा यसको डब्लुएलटिपी रेन्ज ४३० किलोमिटर रहेको छ । ओमोडा ई फाइभको फ्रन्ट–माउन्टेड विद्युतीय मोटरले ३४० एनएम टर्कको उर्जा उत्पन्न गर्दछ ।

नेपाली बजारमा सार्वजनिक भएको एक महिनाभित्रै एसपीजी अटोमोबाइल्सले यस गाडीको ३ सय भन्दा बढि संख्यामा बुकिङ गरेको तथ्याङ्क रहेको बताएको छ । नेपालको प्रतिस्पर्धात्मक सवारी साधनको बजारमा धेरै ग्राहकहरूको ध्यान ओमाडा ई फाइभमै केन्द्रित भएको बुझ्न सकिने समेत कम्पनीको दावी छ ।

ओमोडा ई फाइभको सुरुवाती मूल्य ५९ लाख ४९ हजार रुपैयाँ रहेको छ । यद्यपि अब भने यसको मूल्य ६१ लाख ९९ हजार रुपैयाँ हुनेछ । ओमोडा ई फाइभ गाडीको प्रमुख आकर्षण, एलईडी प्रोजेक्टरयुक्त हेडल्याम्प, नेपाली सडकका निम्ति उपयुक्त उत्कृष्ट १८० एमएमको ग्राउण्ड क्लियरेन्स, १८ इन्चको अलोय ह्विल तथा लेदरका सिट रहेका छन् ।

ओमोडा ई फाइभले एड्भान्स ड्राइभर असिस्टेन्स सिस्टम (एडिएएस) मा ५ स्टार एनक्याप रेटिङ प्राप्त गरेको छ । गाडीमा उपलब्ध लेन डिपार्चर वार्निङ, ब्लाइन्ड स्पट डिटेक्सन, एडेप्टिभ क्रुज कन्ट्रोल र ६ वटा एयर ब्यागले गाडीमा सवार सबैको उच्चतम सुरक्षा सुनिश्चित गर्दछ ।

गाडीको बाहिरी एक्स्टेरियर भाग, ‘एक्स–सेप, फ्रन्ट फेस’ सहित ‘डाइनामिक फास्टब्याक सेप’ डजाइनमा बनेको छ । भित्र इन्टेरियरको भागमा उच्चस्तरको एम्बिएन्ट लाइटिङ, सोनी प्रिमियम स्पिकर तथा भेन्टिलेसनयुक्त सिटको सुविधा रहेको छ । साथै यसमा जडित फास्ट चार्जिङको सहायताले २८ मिनेटमा नै ३० प्रतिशतको ब्याट्रीलाई ८० प्रतिशत बनाउन सक्दछ ।