हर्विनले ल्यायो ३०० किमी रेन्ज दिने नयाँ इलेक्ट्रिक स्कुटर

इलेक्ट्रिक सवारी निर्माता कम्पनी हर्विनले ईआईसीएमए २०२२ मा आफ्नो पहिलो इलेक्ट्रिक म्याक्सी स्कुटर सेन्मेन्टी जिरो सार्वजनिक गरेको छ । सो स्कुटरको डिजाइन, स्पेसिफिकेशन र पावरट्रेन अन्य स्कुटरको तुलनामा फरक छ । कम्पनीले पहिलो इलेक्ट्रिक स्कुटर २०१९ मा लन्च गरेको थियो ।

सो स्कुटर ४०० भी आर्किटेक्चरमा आधारित छ । यो ३० मिनेटमा ० देखि ८० प्रतिशतसम्म चार्ज हुन्छ । इलेक्ट्रिक स्कुटर २.८ सेकेन्डमा ० देखि १०० किमी प्रति घन्टाको स्पिडमा गुड्छ । यसको टप स्पिड २०० किमी प्रतिघन्टा छ । यसले सिंगल चार्जमा ३०० किमीसम्मको रेन्ज दिने कम्पनीको दावी छ ।

सो स्कुटरमा लामो दुरीको यात्राका लागि एक्सटेन्डर फङसन पनि उपलब्ध छ । यद्यपि सो फङसनले कति रेन्ज दिन्छ यसको कुनै खुलासा गरेको छैन । यसमा ब्याट्रीको उपयोग पावर सोर्सको रुपमा पनि गरिने छ ।

सो स्कुटर ३० सेन्सर र क्यामेराले सुसज्जित छ । सेफ्टीको लागि यसमा एबीएस, एन्टि स्लिप सिस्टम, टायर प्रेशर मनिटरिङ सिस्टम र कलिजन अलर्ट जडान गरिएको छ ।

साथै यसमा हिल क्लाइम्ब असिस्ट, स्टार्ट र रिभर्स असिस्टेन्ट, किलेस गो र हिटेड ग्रिप्स, ट्रयाक्शन कन्ट्रोल, हिटेड सिट, टीएफटी डिस्प्ले, ब्लुटुथ कनेक्टिभिटी र एड्जस्टेबल विन्डस्क्रिन जस्ता फिचर रहेको छ । यसमा ३ राइडिङ मोड दिइएको छ ।