जीटी लाइन र एक्स लाइन भेरिएन्टसहित आयो २०२६ किया क्यारेन्स क्लाभिस

किया मोटर्सले आफ्नो लोकप्रिय सवारी क्यारेन्स क्लाभिसलाई अपडेटसहित पेश गरेको छ । नयाँ अपडेटसँगै सो मोडल पहिलेभन्दा अझ लग्जरी, आधुनिक र सुविधासम्पन्न बनेको कम्पनीले जनाएको छ। यसपटक क्यारेन्स क्लाभिसमा दुई नयाँ प्रिमियम भेरिएन्ट जीटी लाइन र एक्स लाइन थपिएको छ ।

नयाँ संस्करणमा कारको बाहिरी बनावटलाई अझ आकर्षक र स्पोर्टी बनाइएको छ। जीटी लाइन भेरिएन्टमा नयाँ डिजाइनका अलोय ह्विल र स्टाइलिश बम्पर समावेश गरिएको छ । ब्रेक क्यालिपरमा प्रयोग गरिएको लाइम रङको फिनिशले यसलाई अझ फरक र आकर्षक बनाएको छ। अर्कोतर्फ, एक्स लाइन भेरिएन्टमा डार्क थिम मन पराउने ग्राहकलाई लक्षित गरिएको छ। यो डार्क गन मेटल र अरोरा ब्ल्याक रङमा उपलब्ध हुनेछ र ६ सिटर कन्फिगरेसनमा क्याप्टेन सिटको सुविधा पनि प्रदान गरिएको छ ।

क्यारेन्स क्लाभिसको मध्यम भेरिएन्ट एचटीके प्लसमा इलेक्ट्रिक सनरुफ उपलब्ध गराइएको छ । टप भेरिएन्टमा प्यानोरामिक सनरुफ र ड्यास क्याम जस्ता अत्याधुनिक सुविधा थपिएको छ । सेफ्टीका लागि लेभल २ एडास समेत कम मूल्यका भेरिएन्टमा उपलब्ध गराएको छ ।

यद्यपि, इन्जिन र गियरबक्समा भने कुनै परिवर्तन गरिएको छैन । यसमा पहिले जस्तै १.५ लिटर पेट्रोल, १.५ लिटर टर्बो पेट्रोल र १.५ लिटर डिजेल इन्जिन विकल्प हुनेछ । गियरबक्समा म्यानुअल, आईएमटी र अटोमेटीक सिस्टमको विकल्प उपलब्ध हुनेछ।

नयाँ क्यारेन्स क्लाभिसको सुरुवाती मूल्य ११ लाख २० हजार भारु एक्स शोरूमबाट सुरु हुन्छ । डिजेल भेरिएन्टको मूल्य १३ लाख १३ हजार भारुबाट सुरु हुने छ भने सबैभन्दा उच्च स्पेसिफिकेसन भएको टर्बो पेट्रोल जीटीएक्स प्लस र एक्स लाइन भेरिएन्टको मूल्य २१ लाख ५६ हजार भारु एक्स तोकिएको छ।