नयाँ कलर अपडेट सहित २०२५ रोयल इन्फिल्ड मेटियर ३५० लन्च

रोयल इन्फिल्डले आफ्नो नयाँ २०२५ मेटियर ३५० बाइक लन्च गरेको छ । मिडसाइज क्रुजर सेग्मेन्टमा धेरै माग हुने यस मोटरसाइकललाई कम्पनीले सेप्टेम्बर १५ मा लन्च गरेको हो । नयाँ मेटियर ३५० फायरबल, स्टेलर, अरोरा र सुपरनोभा गरी चार भेरिएन्टमा उपलब्ध छ ।

कम्पनीले सबै मोडलमा नयाँ कलर अप्सन थपेको छ । सुपरनोभा मोडल आधुनिक क्रोम फिनिशसहित आउनेछ भने अरोरा मोडल पुरानो शैलीका रेट्रो रङमा उपलब्ध हुनेछ । स्टेलर मोडल हल्का र बोल्ड रङ विकल्पमा आउँछ भने फायरबल मोडल भाइब्रेन्ट रङका साथ उपलब्ध हुनेछ । 

यसमा ३४९ सीसी एयर कुल्ड जे सिरिज इन्जिन दिइएको छ, जसले ६१०० आरपीएममा २०.२ बीएचपी पावर र ४००० आरपीएममा २७ एनएम टर्क उत्पादन गर्छ । यसमा ५ स्पिड गियरबक्स जडान गरिएको छ । साथै, नयाँ अपडेटमा एलईडी हेडलाइट, ट्रिपर पोड, एलईडी टर्न इन्डिकेटर, यूएसबी टाइप सी फास्ट चार्जिङ पोर्ट, असिस्ट एन्ड स्लिप क्लच र समायोज्य लिभर जस्ता फिचर थपिएको छ ।

सो बाइकमा कम्पनीले ७ वर्षसम्मको विस्तारित वारेन्टी उपलब्ध गराएको छ । सो वारेन्टीमा ३ वर्ष वा ३० हजार किलोमिटरको मानक कभरेजका साथै अतिरिक्त ४ वर्ष वा ४० हजार किलोमिटरको थप सुविधा समावेश छ।

विश्वभर ५ लाखभन्दा बढी युनिट बिक्री भइसकेको मेटियर ३५० अहिले ६५ भन्दा बढी देशमा लोकप्रिय क्रुजर बाइकको रूपमा स्थापित भइसकेको छ । नयाँ रङ र अत्याधुनिक सुविधासहितको २०२५ मोडलले यसलाई अझै लोकप्रिय बनाउने अपेक्षा गरिएको छ।