बेइजिङ अटो शोमा लन्च भयो २०२४ मोडलको ओरा गुडक्याट

ग्रेटवाल मोटरले २०२४ बेइजिङ अटो शोमा २०२४ मोडलको ओरा ३ लन्च गरेको छ । गुडक्याट समेत भनिने सो ब्रान्ड पाँच विभिन्न ट्रिममा उपलब्ध छ ।

यसको एक्सटेरियर र इन्टेरियर पहिलेकै मोडलको जस्तो छ भने अन्य धेरै कन्फिगरेसन भने परिवर्तन गरिएको छ । यस अनुसार मूल्य समेत बढाइएको छ । साइज पनि पहिलेकै जस्तो छ भने कालो रिम र भीटुएल अर्थात भेइकल टु लोड चार्जिङ स्टेसन भने स्ट्यान्डर्डको रुपमा उपलब्ध छ ।

यसको ककपिट पनि परिवर्तन गरिएको छैन । ओरा ३ मा डबल स्पोक स्टेयरिङ ह्विल तथा ७ इन्चको फुल एलसीडी इन्स्ट्रयुमेन्ट प्यानल र १०.२५ इन्चको सेन्ट्रल कन्ट्रोल स्क्रिन रहेको छ । सेन्टर कन्सोलमा वायरलेस चार्जिङ प्यानल छ ।

थप फिचरको रुपमा प्रिमियम ट्रिममा प्यानोरामिक सनरुफ रहेको छ भने लक्जरी ट्रिममा एल२ एड्भान्स्ड ड्राइभिङ असिस्टेन्स फिचर रहेको छ । एल२ एड्भान्स्ड ड्राइभिङ असिस्टेन्सलाई भ्वाइसबाट संचालन गर्न सकिने अटोनोमस पार्किङ, एआई अटोनोमस पार्किङ र मोबाइल फोन रिमोट पार्किङ जस्ता कार्य गर्न सकिने गरी अपग्रेड गरिएको छ ।

यी वाहेक इन्टिग्रेटेड क्रुज असिस्ट र ट्राफिक जाम असिस्ट पनि उपलब्ध छन् ।

यसमा भएको मोटरले १३५ किलोवाट पावर र २३२ एनएम टर्क जेनेरेट गर्न सक्छ । यसमा भएको ब्याट्रीले ४०१ र ५)१ किलोमिटरको रेन्ज दिने बताइएको छ । ब्याट्रीको वारेमा भने औपचारिक जानकारी दिइएको छैन ।

नेपाली बजारमा पनि ग्रेटवाल मोटरको ओरा ३ अर्थात ओरा गुडक्याट पहिले देखि नै बिक्रीका लागि उपलब्ध छ । नेपालमा हाल ९९ किलोवाट मोटर क्षमताको ओरा गुडक्याट उपलब्ध छ । यसको मूल्य ४७ लाख ४९ हजार रुपैयाँ छ । नेपाली बजारमा भीजी इम्पेक्सले ग्रेटवाल मोटरका सवारी साधन बिक्री–वितरण गरिरहेको छ ।