२०२४ बीवाईडी एट्टो ३ मा व्यापक परिवर्तन, ठूलो टचस्क्रिनदेखि नयाँ अलोय ह्विलसम्म

चिनियाँ अटो निर्माता कम्पनी बीवाईडीले २०२४ मोडलको बीवाईडी एट्टो ३ केही दिन पहिले सार्वजनिक गरेको छ । यसको एक्सटेरियर र इन्टेरियरमा व्यापक परिवर्तन गरेको छ । नयाँ एट्टो ३ मा बीवाईडी सिल सेडानमा प्रयोग भएको ठूलो १५.६ इन्चको रोटेटिङ टचस्क्रिन प्रयोग भएको छ । साथै यसमा १८ इन्चको नयाँ डिजाइनका अलोय ह्विल प्रयोग भएको छ ।

डिजाइन र स्टाइलिङ तथा मेकानिकलमा खासै परिवर्तन नगरे पनि २०२४ एट्टो ३ मा नयाँ कस्मस ब्ल्याक कलर अप्सन थप भएको छ । क्रोम विन्डोको सटा ग्लस ब्ल्याक ट्रिम प्रयोग भएको छ जसमा सिल्भर डी पिलर राखिएको छ । यो एसयुभीमा १८ इन्चको एलो ह्विल राखिएको छ र बुट लिडमा प्रयोग भएको विल्ड योर ड्रिम लोगोलाई छोट्याएर बीवाईडी मात्र लेखिएको छ । नयाँ टायर पहिलेको भन्दा चौडा छ जसले ह्यान्डलिङ र पर्फमेन्सलाई अझ राम्रो बनाउनेछ ।

एट्टो ३ को सबैभन्दा ठूलो परिवर्तन इन्टेरियरमा गरिएको छ । यसमा पहिले १२.८ इन्चको टचस्क्रिन प्रयोग भएको थियो अब भने १५.६ इन्चको रोटेटिङ टचस्क्रिन प्रयोग हुनेछ जुन भर्खरै लन्च गरिएको बीवाईडी सिलमा प्रयोग भएको थियो । नयाँ इन्फोटेनमेन्ट सिस्टमले सुधारिएको भिजिविलिटी र रेस्पोन्समार्फत युजर इन्टरफेसलाई अझ राम्रो बनाउनेछ । नयाँ कलर स्किममा ब्ल्याकसहित डार्क ब्लु हुनेछ । साथै यसको इन्टेलिजेन्ट स्टार्ट सिस्टमका कारण ड्राइभरले ब्रेक पेडललाई थिच्ने वित्तिकै स्टार्ट गर्न सक्नेछ ।

बीवाईडी एट्टो ३ को चार्जिङ स्पिडमा पनि सुधार गरिएको छ । अब यसमा ८८ किलोवाटसम्मको डीसी फास्ट चार्जिङ आउटलेट हुनेछ । अघिल्लो भर्सनमा ८० किलोवाटको थियो । ठूलो स्क्रिन र नयाँ कलर अप्सनका कारण बीवाईडी एट्टो ३ लाई ग्राहकले पक्कै रुचाउने विश्वास गरिएको छ ।

नेपालमा बीवाईडीको आधिकारिक वितरक साइमेक्स इंकले उपलब्ध गराइरहेको एट्टो ३ धेरै बिक्री हुने इलेक्ट्रिक कारमा पर्छ । नयाँ भर्सनको एट्टो ३ पनि भविष्यमा नेपाली बजारमा उपलब्ध हुने अनुमान गर्न सकिन्छ ।