चीनमा बनेको बीवाईडीको इलेक्ट्रिक कार बन्यो २०२३ जापान ईभी अफ द इयर

चीनमा बनेको बीवाईडीको इलेक्ट्रिक कारले सवारी साधन निर्माता कम्पनीहरु धेरै भएको जापानमा ‘२०२३ जापान ईभी अफ द इयर’ अवार्ड प्राप्त गरेको छ ।

बीवाईडी डल्फिनले सो अवार्ड प्राप्त गरेको हो । यति मात्र होइन, बीवाईडीको अर्को इलेक्ट्रिक कार एट्टो ३ ले तेस्रो स्थान हासिल गरेको छ । सो प्रतिस्पर्धामा हुन्डाई कोनाले दोस्रो स्थान प्राप्त गरेको छ ।

जापानको ईभी बजारमा क्रियाशील मिडिया ईभीस्मार्ट र इनर्जी कन्सल्टेन्ट इनचेन्जले आयोजना गरेको सो प्रतियोगितामा पत्रकार र पाठकहरुले भोटिङ गरेका थिए । यसमा फक्सवागन आई.फोर, टेस्ला मोडल एस, एक्स र ३ तथा फियाट ५००ई र हुन्डाई कोना लगायतका सवारी साधन प्रतिस्पर्धामा सामेल थिए ।

यस अनुसार २४१ प्वाइन्ट पाएर डल्फिन पहिलो बन्यो भने कोनाले १५१ र एट्टो ३ ले १४५ प्वाइन्ट पाएका थिए ।

जापानमा धेरै सवारी साधन उत्पादन हुने भए पनि इलेक्ट्रिकमा भने त्यति धेरै लोकप्रिय छैनन् । फेरि यो वर्ष प्रतिस्पर्धामा सामेल १८ प्रतिस्पर्धी मध्ये ४ मोडल मात्र जापनिज थिए । त्यसमा लेक्सस आरजेड र तीन मोडलका भ्यान थिए ।

जापानमा सन् २०२३ को पहिलो हाफमा बिक्री भएका सवारी साधनमा प्योर ब्याट्री ईभी २ प्रतिशत मात्र रहेको बताइएको छ ।