२०२२ मोडलको केटीएम ३९० एड्भेन्चर देखियो भारतीय डिलरमा, तीन महिना भित्र नेपाल आउने

गत महिनामा अमेरिकी बजारमा लन्च भए पश्चात केटीएच २०२२ ३९० एड्भेन्चर भारतीय डिलरसिपमा समेत देखिएको छ । यसका आधारमा भारतमा यसको औपचारिक लन्च छिट्टै गरिने अनुमान गरिएको छ ।

एउटा भारतीय अनलाइन पोर्टलले सार्वजनिक गरेको तस्बिर अनुसार यसको कलर चाहिं नयाँ सार्वजनिक गरिएको मोटोजीपी फ्याक्ट्री सेड एट्लान्टिक ब्लु रहेको छ, जुन पहिले अन्तर्राष्ट्रिय बजारमा उपलब्ध २०२२ आरसी ३९० र २०२२ ८९० ड्युक आरमा समेत गरिएको थियो ।

२०२२ भर्सनको ३९० एड्भेन्चरको वारेमा धेरैले प्रतीक्षा गरिरहेका थिए र यसमा विभिन्न अपडेटहरु गरिने छ । यसमा रोड र अफरोड गरी दुई राइडिङ मोड हुनेछन् । अफरोड मोडलाई अझै सुधार गरिएको छ र बाइक लड्यो भने फेरि उठाउदा आफै रिसेट हुन्छ । राइडिङ र सरफेस कन्डिसन अनुसार रियर ह्विल स्पिनका लागि यसले ट्रयाक्सन कन्ट्रोलको प्रयोग गर्छ ।

यसमा गरिएका अन्य परिवर्तनहरु समेत देख्न सकिन्छ । यो ब्लु एक्सेन्ट सहित अरेन्ज र अरेन्ज एक्सेन्ट सहित ब्ल्याक गरी दुई नयाँ कलरमा उपलब्ध हुनेछ । पहिले यसको अलोय ह्विलमा १२ स्पोक कन्फिगरेसन भएकोमा अब १० स्पोक हुनेछ । यसबाट रिमका स्टिफनेस र रेजिस्टेन्स बढ्ने केटीएमको भनाइ छ ।

अन्य परिवर्तन भने खासै गरिएको छैन । यसमा पहिलेकै ३७३ सीसी सिंगल सिलिन्डर, लिक्विडकुल्ड इन्जिन प्रयोग गरिएको छ, जसले ४३ बीएचपी पावर र ३७ एनएम टर्क जेनेरेट गर्छ । यसमा ६–स्पिड गियरबक्स छ । यसमा बाई–डाइरेक्सनल क्विक–सिफ्टर स्ट्यान्डर्डको रुपमा रहने छ ।

यसमा डब्ल्युपी एपेक्स सस्पेन्सन, स्विचेबल एबीएस सहितको डिस्क ब्रेक, ब्लुटुथ कनेक्टिभिटी सहितको टीएफटी स्क्रिन, राइड बाई वायर थ्रोटल, यूएसबी चार्जिङ पोर्ट र अन्य विभिन्न फिचरहरु उपलब्ध छन् ।

नेपाली बजारमा गत वर्ष भित्रिएको ३९० एड्भेन्चरको मूल्य १० लाख ८९ हजार ९ सय रुपैयाँ छ । हाल नेपालमा करिब १५० युनिट ३९० एड्भेन्चर बिक्री भइसकेका छन् ।

नेपाली बजारमा पनि नयाँ २०२२ मोडलको ३९० एड्भेन्चर आउने बताइएको छ । यद्यपि यसका लागि कमसेकम तीन महिना जति लाग्न सक्ने केटीएमको नेपालका लागि आधिकारिक वितरक हंसराज हुलासचन्द एन्ड कम्पनी स्रोतले बताएको छ ।