१६ सय ट्राफिक प्रहरीद्वारा सिठ्ठीको भरमा १७ लाख सवारी साधनको व्यवस्थापन

काठमाडौं – काठमाडौंका १७ लाख सवारी साधनको व्यवस्थापन हातको र सिठ्ठीको भरमा १६ सय ट्राफिक प्रहरीले गर्दै आएका छन् । सरकारको लापरबाही र बेवास्ताका कारण काठमाडौंमा सवारी साधन व्यवस्थापन गर्न निकै चुनैतीपूर्ण बनेको छ । काठमाडौं उपत्यका ट्राफिक प्रहरी कार्यालयले एक वर्षमा गरेका कार्यक्रम र उपलब्धीहरुको विवरण पेश गर्दै काठमाडौंमा १७ लाख सवारी साधनको व्यवस्थापन १६ सय ट्राफिक प्रहरीले गर्दै आएको बताएको थियो ।

देशको राजधानी काठमाडौंका सडकमा नै ट्राफिक लाइट छैनन् । सरकार आफैंले लगानी गरेर जोड्ने कुरा त परै जाओस् । जापान सरकारले ठूलो लगानी गरेर जोडिदिएको लाइट पनि काम नलाग्ने भइसकेको छ । ट्राफिक लाइट नहुँदा ट्राफिक प्रहरीलाई हैरानी मात्रै छैन, सवारी चालक र यात्रुले समेत सास्ती खेप्नु परेको छ ।

ट्राफिक प्रहरी महाशाखाका प्रवक्ता प्रहरी वरिष्ठ उपरीषक राजेन्द्र प्रसाद भट्टका अनुसार काठमाडौंमा ट्राफिक व्यवस्थापन गर्न निकै चुनौतीपूर्ण रहेको छ । प्रविधिको प्रयोग नगर्दा काठमाडौंमा सवारी व्यवस्थापनको काम दिनदिनै थप चुनौतीपूर्ण बन्दै गएको महाशाखाका प्रवक्ता भट्टको भनाइ छ । विस्तार भएको ८ लेनको रिंगरोडमा पनि ट्राफिक लाइट जोडिएन,’ उनी भन्छन्, ‘यसले गर्दा यात्रु, सवारी चालकलाई मात्रै समस्या छैन, बीच बाटोमा बसेर सवारी व्यवस्थापन गर्ने ट्राफिक प्रहरीको ज्यान नै जोखिममा छ ।’

‘सार्वजनिक यातायातमा मान्छेहरुको भीडभाड एकदमै बढी हुन्छ । जसकारण यात्रुहरु दिक्क भएका कारण निजी सवारी साधन दिनैदिन बढ्दै गएका छन् ।’ भट्टले भने ।

भट्टले थपे, ‘लामो दुरीका सार्वजनिक यातायातले सिट क्षमता भन्दा बढी यात्रु राख्न पाइदैँन । काठमाडौं उपत्यकामा छोटो दुरीमा चल्ने यातायात बढी भएकाले सिट क्षमता भन्दा केही संख्या थप्न पाइन्छ । तर चालकहरु बुझदैँनन् हाल्न पाए भन्दैमा मानिसहरु कोचेर लैजान्छन् ।’

‘सवारी चालकामा चेतनाको कमी भएर होला नियम उल्लंघन गरे आफूहरु ठूलो मान्छे भएको महसुस गर्छन् ।’ भट्टले भने ।