चैत मसान्त सम्म १४७३ विद्युतीय कार आयात

काठमाडौं – नेपालमा चालु आर्थिक वर्षको चैत मसान्त सम्म १ हजार ४७३ विद्युतीय कार भित्रिएका छन् । भन्सार विभागले प्रकाशित गरेको तथ्यांक अनुसार नेपाली बजारमा १०० किलोवाट सम्मका र १०० किलोवाट देखि ३०० किलोवाट माथि सम्म ब्याट्री क्षमता भएका यी सवारी साधन भित्रिएका हुन् ।

तथ्यांक अनुसार १०० किलोवाट सम्मका ७३८ कार भित्रिएका छन् । त्यसैगरी १०० देखि २०० किलोवाट सम्मका ७३२ र २०० देखि ३०० तथा ३०० किलोवाट भन्दा माथिका ३ युनिट कार भित्रिएका छन् ।

यो अवधिमा सबैभन्दा बढी विद्युतीय कार चीनबाट भित्रिएका छन् । चीनबाट ७७७ युनिट कार भित्रिएका छन् भने भारतबाट ५१२ युनिट कार भित्रिएका छन् । त्यसैगरी कोरियाबाट १३८, जापानबाट २८ र अमेरिकाबाट १७ युनिट कार भित्रिएका छन् ।

यो भन्दा पहिले फागुन मसान्त सम्म १ हजार ३५७ कार, जिप, भ्यान भित्रिएका थिए । यस अनुसार एक महिनाको अवधिमा ११६ कार, जिप, भ्यान मात्र भित्रिएका छन् ।

विश्वव्यापी रुपमा हेर्दा चीनमा सन् २०२१ मा मात्रै ११ लाख ४९ हजार वटा नयाँ विद्युतीय सवारी साधन दर्ता भए । अमेरिकामा दुई लाख ९७ हजार, युरोपमा १० लाख ६० हजार वटा विद्युतीय सवारी साधन त्यस वर्ष दर्ता भएको देखिन्छ ।

नेपालमा पनि विद्युतीय सवारी साधनप्रतिको चासो बढ्दै गए पनि सहज रुपमा चार्जिङ स्टेशन उपलब्ध हुन सकेको छैन । प्राधिकरणले पहिलो चरणमा देशभर निर्माण गर्न लागेको ५० चार्जिङ स्टेशनको काम अगाडि बढिरहेको छ ।

निजी क्षेत्रबाट हुन्डाई कम्पनीले देशभर ४० वटा चार्जिङ स्टेशन निर्माण गरेको छ । निजी क्षेत्रका सवारी साधन बिक्रेता कम्पनीले आफ्नै सापेक्षतामा विद्युतीय चार्जिङ स्टेशन निर्माण गरिरहेको छ । विपी राजमार्गमा चल्ने दिगो सवारीले आफैँ चार्जिङ स्टेशन निर्माण गरेको छ । निजी क्षेत्रले समेत चासो देखाएको अवस्थामा सरकारले नीतिगत रुपमा थप प्रस्ट पार्नुपर्ने आवश्यकता बढेर गएको छ ।