जिपको नयाँ कम्पासमा बढ्यो आकर्षण, स्पोर्ट र एस– मोडल खरिद गर्न डेढ महिनासम्म कुर्नुपर्ने

अमेरिकन आइकनिक ब्रान्ड जिपको नयाँ कम्पासले अहिले नेपाली एसयूभी पारखीलाई आकर्षित गर्न थालेको छ । मिड साइज एसयूभी नयाँ कम्पास जिप ब्रान्डको प्रतिष्ठित लिगेसीका साथै आकर्षक डिजाइन, अत्याधुनिक प्रविधि, आरामदायी तथा सुबिधासम्पन्न फिचर्स र मनमोहक इन्टेरियरका कारण लोकप्रिय बन्दै गएको हो ।

महंगो र प्रिमियम ब्रान्डका रुपमा परिचित जिप ब्रान्डका सवारीसाधनलाई आफ्नो ड्रिम कारका रुपमा लिने ग्राहकहरु विश्वभर बढिरहेका छन् । जसको प्रभाव नेपाली अटो पारखीहरुमा समेत देखा पर्न थालेपछि यो ब्रान्डतर्फको आकर्षण थप बढ्न थालेको हो ।

नेपाली बजारमा यसै बर्षको असार अन्तिमतिर सार्वजनिक भएको नयाँ कम्पास अहिले प्रिमियम एसयूभी सेग्मेन्टमा सर्बाधिक बिक्री हुने साधनका रुपमा स्थापित भैसकेको छ । पुरानो मोडललाई अपग्रेड गरेर ल्याइएको यो एसयूभीको इन्टेरियरमा कम्पनीले निकै नै बढी सुधार गरेको छ ।
जसका कारण यो नयाँ मोडलले अहिले एसयूभी पारखीलाई आकर्षित गरिरहेको छ । नयाँ मोडल भित्रिएको ३ महिना अवधिमा १ सय थान हाराहारी बिक्री भएको नयाँ कम्पासको बिक्री पछिल्लो समय महिनाकै ४ दर्जन हाराहारी पुगेको आधिकारिक बितरक एमएडब्लु लाइफ स्रोतले बताएको छ । असोज महिनामा यो एसयूभी ४ दर्जन हाराहारीमा बिक्री भएको उक्त स्रोतले बताएको हो ।

नयाँ एसयूभी स्पोर्ट, लंगिच्युड, लिमिटेड र मोडल एस गरी चार ट्रिम र आठ भेरिएन्टमा उपलब्ध रहँदै आएपनि हाल स्पोर्ट र मोडल एसको भने अभाव देखिएको छ । भारतमै उत्पादन कम भएका कारण यी एसयूभी माग बमोजिम नेपालमा आपूर्ति हुन नसकेका कारण अभाब भएका हुन् । यी एसयूभी हात पार्न ग्राहकले बुकिङ लिएर कम्तिमा पनि डेढ महिनासम्म कुर्नुपर्ने कम्पनी स्रोतले बताएको छ । अन्य दुई मोडल लंगिच्युड र लिमिटेड भने ग्राहकले चाहेकै समयमा हात पार्न सक्ने अवस्थामा रहेको बताइएको छ ।

यस्तो छ नयाँ कम्पासको पावर, पर्फमेन्स, फिचर्स र मूल्य
१.४ र २.० लिटर पावरट्रेनमा उपलब्ध यसको १.४ लिटरको मल्टिएयर टर्बो इन्जिनले अधिकतम १६० एचपी पावर र २५० एनएम टर्क जेनेरेट गर्छ । यो ६ स्पिड म्यानुअल ट्रान्समिसन र ७ स्पिड डीसीटी अटोमेटिक अप्सनमा उपलब्ध छ । त्यसैगरी २.० लिटर मल्टिजेट टु इन्जिनले १७० एचपी पावर र ३५० एनएम टर्क जेनेरेट गर्छ । यो भने ६ स्पिड म्यानुअल ट्रान्समिसन र ९ स्पिड अटोमेटिक ट्रान्समिसनमा उपलब्ध रहँदै आएको छ । फोर ह्विल ड्राइभ डिजेल भेरिएन्टमा उपलब्ध रहेको छ, जसमा अटो, स्नो, स्यान्ड र मड गरी चार वटा मोड उपलब्ध गराइएको छ ।

नयाँ कम्पासमा इन्टिग्रेटेड डीआरएलसहितको रिभाइज्ड हेडलाइट, नयाँ फगलाइट हाउजिङ, ठूलो एअरड्याम भएको नयाँ डिजाइनको फ्रन्ट बम्पर र नयाँ अलोय ह्विल रहेका छन् । यसमा पहिले झैं जिपको आकर्षक सेभेन स्लट ग्रिल र ट्रापेजोइडल ह्विल आर्क दिइएको छ ।

यो एसयूभीमा रिभेम्प गरिएको ड्यासबोर्ड, नयाँ एसी भेन्ट, एचभीएसी कन्ट्रोल र बीचमा नयाँ १०.१ इन्चको टचस्क्रिन रहेको छ । त्यसैगरी, यसमा १०.२५ इन्चको डिजिटल इन्स्ट्रयुमेन्ट क्लस्टर, डबल–स्टिच लेदर इन्सर्ट र नयाँ थ्री स्पोक स्टेयरिङ ह्विल रहेको छ ।

त्यसैगरी यो नयाँ एसयूभीमा एफसीएले निर्माण गरेको पाँचौं पुस्ताको युकनेक्ट इन्फोटेनमेन्ट सिस्टम, वायरलेस एप्पल कारप्ले र एन्ड्रोइड अटो समेत रहको छ । नयाँ फिचरमा ड्युअल–जोन अटोमेटिक क्लाइमेट कन्ट्रोल, पावर टेलगेट, ३६० डिग्री क्यामेरा, भेन्टिलेसन फिचर सहितको ८ वे इलेक्ट्रिकल्ली एड्जस्टेबल फ्रन्ट सिट रहेको छ ।

सुरक्षाका लागि नयाँ कम्पासमा फ्रिक्वेन्सी ड्याम्पिन सस्पेन्सन, ६ एयरब्याग, एन्टिरोल मिटिगेसन, ट्रयाक्सन कन्ट्रोल, इएससी, हिल स्टार्ट असिस्ट, इबीडीसहितको एबीएस, रेन ब्रेक असिस्ट, पार्किङ सेन्सर र आइसोफिक्स चाइल्ड सिट माउन्ट लगायत ५० भन्दा बढी सुरक्षाको व्यवस्था रहेको छ ।

नेपाली बजारमा यसको स्पोर्ट मोडलको मूल्य ८४ लाख ९० हजारबाट शुरुवात गरिएको छ । त्यसैगरी लंगिच्युडको मूल्य ९९ लाख ९० हजार, लिमिटेडको १ करोड ९ लाख ९० हजार र मोडल एसको १ करोड ३६ लाख ९० हजारदेखि सुरुवात गरिएको छ ।