चीनमा सवारी साधनको विक्री बढ्यो

चीनमा सवारी साधनको विक्री बढेको छ ।  कोरोना भाइरसको महामारी कारण केही समय शिथिल रहेको चिनियाँ अर्थतन्त्रमा व्यापक सुधार आउन थालेसँगै अटो बजारमा पनि पुनर्बहाली आएको हो ।

चिनियाँ अटोमोबाइल उत्पादक संघका अनुसार अगष्टको तुलनामा सेप्टेम्बरमा सवारी साधनको विक्री ७ दशमलव ४ प्रतिशतले बढेको छ । अगष्टमा पनि मासिक विक्री ११ दशमलव ६ प्रतिशतले बढेको थियो ।  

गत वर्षको सोही अवधिको तुलनामा यस वर्षको पहिलो नौ महीनामा भने विक्री  ६ दशमलव ९ प्रतिशतले घटेको थियो । महामारीका कारण कलकारखाना बन्द हुनु अघि नै चीनमा सवारी साधनको विक्री घटेको थियो ।

अर्थतन्त्रमा आएको सुस्ती र अमेरिकासँगको व्यापार युद्धको चपेटामा अटो क्षेत्र आएको थियो । गत वर्ष पनि सवारी साधनको विक्री ९ दशमलव ६ प्रतिशतले घटेको थियो ।