नयाँ ५० किलोवाट आवर ब्याट्रीयुक्त बीवाईडी एट्टो ३ मा यी हुनेछन् पहिलेको एट्टो ३ भन्दा फरक फिचर

नेपाली बजारमा बीवाईडी एट्टो ३ को नयाँ भेरिएन्ट आउने भए पछि फेरि इलेक्ट्रिक कार बजारमा अर्को चर्चा चुलिएको छ । पहिले देखि नै नेपाली बजारमा यो गाडी उपलब्ध भए पनि अब भने ब्याट्री क्षमता घटेर आउने भएको छ ।

नयाँ मोडलको रुपमा ४९.९२ किलोवाट आवरको ब्याट्री प्याकयुक्त एट्टो ३ हुनेछ । सो गाडीको मूल्य ५५ लाख ९९ हजार रुपैयाँ तोकिएको छ । यसमा १०० किलोवाट क्षमताको मोटर नै हुनेछ ।

नेपाली बजारमा पहिले देखि नै ६०.४८ किलोवाट आवरको ब्याट्री प्याकयुक्त एट्टो ३ छ । यसमा १०० किलोवाटको मोटर नै छ भने यसको मूल्य ६५ लाख ८८ हजार रुपैयाँ तोकिएको छ ।

४९.९२ किलोवाटयुक्त एट्टो ३ लाई एड्भान्स्ड र ६०.४८ किलोवाटयुक्त एट्टो ३ लाई सुपेरियर भनेर राखिएको छ । मूल्य वाहेक यी दुई गाडीको फिचरमा के फरक छ भन्ने कुरामा धेरैलाई चासो हुन सक्छ ।

यी दुई गाडीको रेन्ज, टायर साइज, स्पिकर, वायरलेस चार्जिङ, एम्बियन्ट लाइट डोर ह्यान्डल, डीसी चार्जिङ पोर्ट सीसीएस २, वान टच टेलगेट र पीएम २.५ एयर फिल्टर आदिमा फरक छ ।

एड्भान्स्डले ३४५ र सुपेरियरले ४२० किलोमिटर रेन्ज दिन्छ । वायरलेस चार्जिङ, वान टच टेलगेट र पीएम २.५ एयर फिल्टर एड्भान्स्डमा छैन, तर अर्कोमा छ ।

यी दुई गाडीमा यस्ता फिचर फरक भए पनि पर्फमेन्समा भने खासै फरक नहुने देखिएको छ ।