उकालोमा गाडी बन्द भयो ? यसरी बढाउनुस् अगाडि

कहिलेकाहिं उकालो ठाउँमा पनि सवारीको स्टार्ट बन्द हुन सक्छ । यसरी बन्द हुँदा स्टार्ट गरी अगाडि बढाउन केही कठिन हुन्छ । यस्तो अवस्थामा चालकले अपनाउनु पर्ने कार्यको वारेमा राम्रो जानकारी हुनु आवश्यक छ । दक्ष चालकलाई यो सहज कार्य नै मानिन्छ । सिकारु र सक्षम नभइसकेकालाई यो ठूलो कठिनाइ हो ।

यसका लागि चालकहरुले निम्न कुरामा ध्यान पु-याउनु पर्छ :
१. गाडीको ह्यान्ड ब्रेक लगाउनु पर्छ ।
२. पछाडिका चक्कामा ओट लगाउनु पर्छ ।
३. त्यसपछि सवारी स्टार्ट गर्नुपर्छ ।
४. सवारी स्टार्ट भइसके पछि एक्सिलरेटर अलिकति थिची इन्जिनको गति बढाउनु पर्छ ।
५. ह्यान्ड ब्रेकले धान्न नसक्ने भए फुट ब्रेक पनि लिनु पर्छ ।
६. गाडी स्टार्ट भइसके पछि बायाँ खुट्टाले क्लच थिची १ नम्बर गियरमा लगाउनु पर्छ ।
७. १ नम्बर गियर लगाएपछि दाहिने खुट्टाको एक छेउले फुट ब्रेक छोड्ने र अर्को छेउले एक्सिलरेटर चिच्दै जाने र क्लचमा भएको बायाँ खुट्टा पनि विस्तारै उठाउँदै जाने काम एकैसाथ गरिएमा सवारी अगाडि बढ्छ ।
८. गाडी उकालो चढ्नु अघि नै उकालोको अवस्था अनुसारको गियर लगाउनु पर्छ । चढ्दै गर्दा गियर लगाउनु राम्रो हुँदैन ।
९. उकालोमा रहेको गाडी स्टार्ट गर्दा आवश्यक परेमा गियर लगाएकै बेला पनि क्लच थिचेर इन्जिन स्टार्ट गर्न सकिन्छ । यसरी स्टार्ट गर्दा अगाडि बढाउन सजिलो पर्छ तर यसो गर्दा सवारीमा ओट नराखी गर्नुहुँदैन ।
१०. उकालोमा गाडी रोक्नु परेको अवस्थामा ह्यान्ड ब्रेक लगाएर मात्र पुग्दैन, फुट ब्रेक पनि लगाउनु पर्छ र पहिलो गियरमा राखी ओट लगाएमा झन् राम्रो हुन्छ ।

माधव प्रसाद अधिकारी
भेइकल एकेडेमी एन्ड रिसर्च सेन्टर
गुर्जधारा, काठमाडौं