सोनेट र म्यागनाइट थपिंदा ब्रेजा, नेक्सन र भेन्युको बजार गुम्ने

नेपाली अटो बजारमा कम सीसी इन्जिन क्षमता भएका एसयूभीको बजार प्रतिस्पर्धात्मक बन्दै गएको छ । क्रसओभर समेत भनिने यस्ता एसयूभीको बजार बिस्तार हुँदै गएपनि प्रतिस्पर्धि ब्रान्ड र तिनले बजारमा उतारेका नयाँ मोडलका कारण बजार थप प्रतिस्पर्धात्मक बन्ने देखिएको हो ।

हाल यो सेग्मेन्टमा टाटा नेक्सन, सुजुकी ब्रेजा, हुन्डाई भेन्यु र फोर्ड इकोस्पोर्ट उपलव्ध छन् । यो लाइनमा पछिल्लो सयम निसानले म्यागनाइट र किया मोटर्सले सोनेट उतार्ने तयारी गरिरहेको छ । म्यागनाइट अबको १ महिनापछि नेपाली बजारमा भित्रिने कम्पनी स्रोतले जनाएको छ भने सोनेटको हाल प्रि–बुकिङ लिने काम भइरहेको छ ।

यो सेग्मेन्टमा सुजुकी ब्रेजाले बजारको नेतृत्व गरिरहेको छ भने उसलाई हुन्डाई भेन्यु र टाटा नेक्सनले पछ्याइरहेको छ । फोर्ड इकोस्पोर्टको बजार हिस्सा समेत निकै आकर्षक रहेको छ । यी ४ ब्रान्डलाई टक्कर दिन छिट्टै बजार आउने तयारी गरिरहेका किया सोनेट र निसान म्यागनाइटले हाल विद्यमान यी ब्रान्डको बजार हिस्सा घटाउने र प्रतिस्पर्धा थप कडा हुने सहजै अनुमान लगाउन सकिन्छ ।

यस्तो बन्न सक्छ बजार हिस्साको समिकरण
यो सेग्मेन्टमा सबैभन्दा पहिले नेपाल भित्रिएको फोर्ड इकोस्पोर्टले तत्कालीन समयमा एकछत्र बजार लिएको थियो । फोर्ड इकोस्पोर्टलाई कम्पनीले कम्प्याक्ट एसयूभी सेग्मेन्टमा राखे पनि इन्जिन क्षमता, पावर तथा पर्फमेन्स र मूल्यका आधारमा यो क्रसओभर सेग्मेन्ट अन्तर्गतकै एसयूभी हो ।

लामो समयसम्म बजार नेतृत्व लिन सफल इकोस्पोर्टको गतिमा सुुजुकी ब्रेजाले ब्रेक लगाइदिए पछि यो एसयूभीको बिक्री प्रभावित बन्यो । ब्रेजा सार्वजनिक भएपछि हाल यसले बजारको नेतृत्व लिइरहेको छ । ब्रेजा भित्रिएको केही समयको अन्तराल पछि टाटा नेक्सन र हुन्डाई भेन्युले इन्ट्रि गरेपछि यो सेग्मेन्टमा प्रतिस्पर्धा समेत चर्किरहेको छ ।

सुरुवाती समयमा ब्रेजाको ठूलो बजार हिस्सामा नेक्सन र भेन्यु बाधक बनिरहेको छ । तथापि ब्रेजाले नै यो सेग्मेन्टमा बजारको नेतृत्व लिइरहेको छ भने नेक्सन र भेन्युले उसँगको दुरी एकदमै छोट्याइरहेको प्रष्ट हुन्छ । बजारको कुरा गर्नुपर्दा नेपालमा यो सेग्मेन्टको हिस्सा कुल प्यासेन्जर कारको झन्डै ३० प्रतिशत हाराहारीमा छ । जसमा माथि उल्लेख गरिएका ४ ब्रान्डले कारोबार गरिरहेका छन् । यसमा किया सोनेट र निसान म्यागनाइट समेत थपिने भएपछि यो ६ वटा ब्रान्डमा बाडिने र यसले यसअघिका ब्रान्डको बजार हिस्सा गुम्ने प्रष्ट देखिन्छ । यद्यपि नयाँ गाडीमा उपभोक्ताले कस्तो रुचि ब्यक्त गर्छन् भन्ने विषयले यसमा प्रभाव पार्नेछ ।

नेपालस्थित आधिकारिक वितरकहरु यो सेग्मेन्टमा आफ्नो बजार हिस्सा बढाउन आक्रमक भएबाट भोलिका दिनमा क्रसओभर सेग्मेन्टको बजार थप प्रतिस्पर्धात्मक बन्ने भने निश्चित प्रायः छ । त्यसमाथि पनि लामो समयसम्म पर्ख र हेरको अवस्थामा रहेको किया गाडीको नेपालस्थित आधिकारिक वितरक कन्टिनेन्टल ट्रेडिङ इन्टरप्राइजेज भारतमा सेल्टोस एसयूभी सार्वजनिक भएसँगै बजार विस्तारमा आक्रामक बन्दै गएको छ । नेपालमा किया गाडीको भविष्य सेल्टोस र सोनेटले निर्धारण गर्ने बुझाइमा रहेको यो कम्पनीले नयाँ गाडीको बजार प्रवद्र्धनमा खरो उत्रिने देखिन्छ । जसले यसअघि स्थापित भइसकेका अन्य ब्रान्डलाई धक्का नदेला भन्न सकिदैन ।

अर्कोतर्फ प्रोडक्टले साथ नदिंदा नदिदै पनि निसान गाडीको आधिकारिक वितरक पायोनियर मोटोकर्पले टेरानो र किक्स एसयूभी राम्रै संख्यामा बिक्री गर्न सफल भयो । यस्तो अवस्थामा समेत आक्रामक बजार विस्तार गर्नबाट पछि नहटेको पायोनियरले बिश्व बजारमै बहु प्रतीक्षित बजेट एसयूभी म्यागनाइटलाई स्थापित गराउन कुनै कसर बाँकी नराख्ने स्पष्ट देखिएको छ । गाडी सार्वजनिक नहुँदै कम्पनीले यसको बजार प्रवद्र्धन गर्न थालिसकेबाट यो एसयूभीमा सफल हुन पायोनियर खरो उत्रने निश्चित प्रायः देखिन्छ । जसको असरले यसअघि स्थापित भनिएका टाटा, सुजुकी, हुन्डाई र फोर्डको विद्यमान बजार हिस्साको समिकरणलाई फेरबदल गर्न सक्छ ।

यी दुई ब्रान्डका क्रसओभरले औपचारिक कारोबार थालेपछि सुजुकी, हुन्डाई र टाटा मध्ये कसको बजार बढी खोसिन्छ भन्ने विषयले भविष्यमा बन्न सक्ने बजार हिस्साको समिकरणलाई निर्धारण गर्ने देखिन्छ । यद्यपि मूल्य र लोकप्रियताको हिसावले ब्रेजा अगाडि रहेको हुँदा यसको बजार हिस्सा केही गुमेपनि तत्कालका लागि सुजुकी ब्रेजाले नै बजारको नेतृत्व गरिरहने देखिन्छ भने दोस्रो र तेस्रो स्थानका लागि हुन्डाई भेन्यु र टाटा नेक्सनबीच प्रतिस्पर्धा हुनेछ । नयाँ मोडल भएको हुँदा सोनेट र म्यागनाइटलाई यी तीन गाडीको बराबरीमा आउन लामै समय कुर्नुपने देखिन्छ ।