स्कोडाको नयाँ कम्प्याक्ट एसयूभी काइलक, अर्को वर्ष लन्च हुने

स्कोडा इन्डियाले आफ्नो आगामी कम्प्याक्ट एसयूभी कारको नाम घोषणा गरेको छ । सो गाडी स्कोडा काइलक नामबाट आउनेछ र यो २०२५ मा भारतीय बजारमा लन्च हुनेछ ।

कम्पनीले सो एसयूभीको साइड प्रोफाइलको टिजर पनि जारी गरेको छ, जसमा रूफ रेल र र्‍यापराउन्ड टेल ल्याम्प देखिएको छ । साथै सो एसयूभीको स्प्लिट हेडल्याम्प डिजाइन र एलईडी डीआरएलसहित केही डिजाइन पनि सार्वजनिक गरेको छ ।

सो एसयूभी कम्पनीको एमक्युबी-एओ-इन प्लेटफर्ममा विकास भइरहेको छ । यसको मूल्य ८ लाख ५० हजार भारुबाट सुरु हुन सक्ने अनुमान गरिएको छ । यसले मारुती ब्रेजा, किया सोनेट, टाटा नेक्सन, महिन्द्रा एक्सयूभी थ्रीएक्सओ, हुन्डाई भेन्यु, रेनो काइगर र निसान म्याग्नाइटसँग प्रतिस्पर्धा गर्नेछ ।

स्कोडाले आफ्नो नयाँ कम्प्याक्ट एसयूभीमा परफर्मेन्सको लागि कुशाकमा जस्तै पावरट्रेन सेटअप उपलब्ध गराउन सक्ने अनुमान गरिएको छ । कुशाकमा १.० लिटर टीएसआई टर्बो पेट्रोल इन्जिन छ, जसले ११५ एचपीको पावर र १७८ एनएमको टर्क जेनेरेट गर्छ । सो इन्जिनमा ट्रान्समिसनका लागि ६ स्पिड म्यानुअल र ६ स्पिड टर्क कन्भर्टर अटोमेटिक गियरबक्सको विकल्प उपलब्ध हुने अपेक्षा गरिएको छ ।

स्कोडा काइलकमा १०.२५ इन्चको टचस्क्रिन इन्फोटेनमेन्ट सिस्टम, वायरलेस एन्ड्रोइड अटो र एप्पल कारप्ले, फुल डिजिटल ड्राइभर डिस्प्ले, भेन्टिलेटेड फ्रन्ट सिट, वायरलेस फोन चार्जर र सनरुफ उपलब्ध हुनेछ । साथै सेफ्टिका लागि ६ एयरब्याग, ३६० डिग्री क्यामेरा, इलेक्ट्रोनिक स्टेबिलिटी कन्ट्रोल र टायर प्रेसर मोनिटरिङ सिस्टम जस्ता फिचर उपलब्ध हुनेछ ।