नयाँ स्कोडा कोडियाक : भारतमा २० दिनमै सोल्ड आउट, नेपालमा प्रतीक्षा

गत जनवरी १० मा भारतमा लन्च गरिएको स्कोडा कोडियाक फेसलिफ्टको पहिलो लट २० दिनमै सोल्ड आउट भएको छ । सन् २०२२ को पहिलो ब्याचका लागि तयार गरिएको १ हजार २ सय युनिट स्कोडा कोडियाक सबै सोल्ड आउट भएको बताइएको छ ।

भारतमै एसेम्बल्ड गरिएको स्कोडा कोडियाक ७ सिटर एसयूभी हो । नयाँ स्कोडा कोडियाक दुई वर्ष पश्चात फेरि अपडेटका साथ लन्च गरिएको थियो । यसको एक्सटेरियरका साथै इन्टेरियरमा समेत अपडेट गरिएको छ । अब दोस्रो ब्याचको कोडियाकको मूल्य भने १ लाख रुपैयाँ बढेर आउने बताइएको छ ।

तीन ट्रिममा उपलब्ध नयाँ स्कोडा कोडियाकको मूल्य ३४ लाख ९९ हजार देखि ३७ लाख ९९ हजार भारु सम्म तोकिएको थियो । यो एसयुभीमा नयाँ २।० लिटर टर्बो पेट्रोल इन्जिन समावेश गरिएको छ । जसले १९० पीएसको पावर र ३२० एनएमको टर्क जेनेरेट गर्छ । सो इन्जिन ७ स्पिड डुअल क्लच अटोमेटिक गियरबक्स छ र अल ह्वील ड्राइभ सिस्टममा उपलब्ध छ । सो एसयूभीमा डिजेल इन्जिनको विकल्प भने दिएको छैन ।

यसको लम्बाई, चौडाई र उचाई क्रमशः ४६९७ एमएम, १८८२ एमएम र १६८१ एमएम छ । यसको बुट स्पेस २७० लिटर छ । थर्ड रो सिटलाई फोल्ड गरेमा यसको बुट स्पेस २ हजार लिटर भन्दा बढी हुन्छ ।

नयाँ कोडियाक फेसलिफ्टमा नयाँ डिजाइन गरिएको फ्रन्ट ग्रिल, अपडेटेड एलईडी म्याट्रिक्स हेडल्याम्प, नयाँ फ्रन्ट र रियर बम्पर तथा पहिलाको भन्दा आकर्षक बोनट समावेश गरिएको छ । साथै नयाँ डिजाइन गरिएको अलोय ह्वील र टेलल्याम्प छ । अलोय ह्विल २० इन्चको छ र यो ड्युअल टोनयुक्त छ ।

इन्टेरियरको लेआउट पहिले जस्तै छ । यसको स्टेयरिङ भने टु–स्पोक्ड छ । यसमा १०.२५ इन्चको भर्चुअल ककपिट डिजिटल इन्स्ट्रयुमेन्ट क्लस्टर, ८ इन्च र ९.२ इन्चको टचस्क्रिन इन्फोटेनमेन्ट सिस्टम, अटोमेटिक क्लाइमेट कन्ट्रोल, एम्बिएन्ट लाइटिङ आदि सुविधा उपलब्ध छ ।

सुरक्षाका लागि नयाँ स्कोडा कोडियाकमा ९ एयरब्याग, ईबीडी सहितको एबीएस, ईएससी, एएसआर, ईडीएल र अन्य धेरै फिचर उपलब्ध छन् ।

नेपाली बजारमा भने सिधै चेक रिपब्लिकमा उत्पादन भएको स्कोडा कोडियाक उपलब्ध हुने नेपालका लागि आधिकारिक वितरक एमएडब्ल्यु इन्टरप्राइजेजले बताएको छ । नेपाली बजारमा पनि नयाँ स्कोडा कोडियाक मार्च महिना सम्ममा बिक्रीका लागि उपलब्ध हुने अनुमान गरिएको छ ।