‘रियल ड्राइभर्स वान्टेड’ थिमसहित स्कोडा कुशाक फेसलिफ्ट सार्वजनिक, सुरुवाती मूल्य ५७.९० लाख

काठमाडौँ–नेपाली अटोबजारमा निकै प्रतिक्षा गरिएको एसयूभी स्कोडा कुशाक फेसलिफ्ट आधिकारिक रूपमा सार्वजनिक भएको छ । नेपालका लागि स्कोडाको आधिकारिक विक्रेता एमएडब्लु एक्स्पान्जले आइतबार एक विशेष कार्यक्रमका बीच ‘रियल ड्राइभर्स वान्टेड’ अभियानका साथ यसलाई बजारमा उतारेको हो ।

नयाँ कुशाकको अनावरण एमएडब्लु ग्रुपका अध्यक्ष विष्णु कुमार अग्रवाल तथा एमएडब्लु एक्स्पान्जका प्रमुख कार्यकारी अधिकृत रौनक अग्रवालले संयुक्त रूपमा गरे । कुशाकले युरोपेली इन्जिनियरिङलाई नेपाली सडकमा ल्याएको ग्रुपका अध्यक्ष विष्णु कुमार अग्रावलले बताए ।

क्लासिक प्लस, स्पोर्ट लाइन र मोन्टे कार्लो गरी कुल तीन भेरिएन्टमा उपलब्ध यस गाडीको सुरुवाती मूल्य रु. ५७ लाख ९० हजार रुर्पैयाँ तोकिएको छ । सबैभन्दा महंगो भेरिएन्टको ९१ लाख ९० हजार रुपैयाँ पर्ने बताइएको छ ।

नयाँ कुशाक फेसलिफ्टको एक्स्टेरियरमा व्यापक परिमार्जन गरिएको छ । यसमा नयाँ डिजाइनको फ्रन्ट ग्रिल, थप मस्कुलर बम्पर, र प्रिमियम लुक्स दिने स्लिम एलईडी हेडल्याम्प्स र एलईडी डिआरएलएस जडान गरिएको छ । गाडीको रियर प्रोफाइलमा यो सेग्मेन्टमै पहिलो पटक इलुमिनेटेड स्कोडा वर्डमार्क सहितको कनेक्टेड एलईडी टेललाइट उपलब्ध छ, जसले यसलाई सडकमा गुड्दा निकै आकर्षक र प्रिमियम देखाउँछ ।

१.० लिटर र १.५ लिटर टिएसआई इन्जिन विकल्पमा उपलब्ध यो एसयूभी ८ स्पिड अटोमेटिक तथा डीएसजी ट्रान्समिसनमा उपलब्ध छ ।

यस एसयूभीको टप भेरियन्टमा प्यानोरामिक सनरुफ, वायरलेस एन्ड्रोइड अटो र एप्पल कारप्ले, ६ वे पावर्ड भेन्टिलेटेड सिट, र एम्बियन्ट लाइटिङ जस्ता फिचर्स छन् । सुरक्षाको सवालमा स्कोडा कुशाक ग्लोबल एनक्याप क्र्यास टेस्टमा ५ स्टार सेफ्टी रेटिङ प्राप्त गाडी हो । कारमा ६ वटा एयरब्याग स्ट्यान्डर्ड (सबै भेरियन्टमा अनिवार्य) गरिएको छ ।

यसका साथै इलेक्ट्रोनिक स्ट्याबिलिटी कन्ट्रोल (ईएससी), एबीएस, ईबीडी, टायर प्रेसर मोनिटरिङ, र टप भेरियन्टमा चारै पाङ्ग्रामा डिस्क ब्रेक जस्ता ४० सम्म सक्रिय तथा निष्क्रिय सुरक्षा सुविधाहरू समावेश छन् ।

स्कोडा नेपालले ग्राहकको मर्मतसम्भार लागतलाई पारदर्शी र किफायती बनाउन ‘प्रमिस अफ १२’ योजना समेत घोषणा गरेको छ । यस योजना अन्तर्गत ग्राहकले देशभरका १२ वटै सेवा केन्द्रबाट कुनै पनि लुकेको शुल्कबिना, हरेक १२ महिना वा १२ हजार किलोमिटरको वार्षिक मर्मतसम्भार केवल १२ हजार रुपैयााको निश्चित शुल्कमा गराउन सक्नेछन् ।

यो कार नेपाली सडकका चुनौतीपूर्ण पहाडी राजमार्गदेखि व्यस्त सहरी क्षेत्रसम्मका लागि उत्कृष्ट र किफायती विकल्प बन्ने कम्पनीको विश्वास छ ।