लिप मोटर्सको बिक्रेतामा सांग्रिला मोटर्स नियुक्त, अटो शोमा सी-१० एसयूभी लन्च गर्ने

काठमाडौं–लिप मोटर्सको बिक्रेतामा सांग्रिला मोटर्सले बाजी मारेको छ । यसअघि एमएडब्लु ग्रुप अन्तर्गतको बाणिज्य विकास कम्पनीले लिप मोटर्सका ईभी आयत गर्ने चर्चा चलेपनि अन्तिममा सांग्रिला मोटर्सले डिलरसिप पाएको हो ।

लिप मोटर्समा स्टेलान्टिस समुहको प्रवेशसंगै यी दुई कम्पनीले डिलरसिप लिन आफ्नो दावी पेश गरेका थिए । उक्त समुहमा सामेल जीपलाई एमएडब्लु ग्रुपले बिक्री गर्दै आएको छ भने सिट्रोन र पूजोलाई सांग्रिला मोटर्सले बिक्री गरिरहेको छ । बाणिज्य विकास प्रालिले टि–०३ मोडल ल्याउने भन्दै मूल्य सूची समेत प्रकाशन गरिसकेको थियो ।

आगामी नाडा अटो शोमा सहभागी हुन लिप मोटर्सको नाममा सांग्रिला मोटर्सले स्टल समेत वुकिङ गरिसकेको छ । कम्पनीले लिप मोटर्सको पहिलो मोडलका रुपमा सी–१० एसयूभी ल्याउने योजना बनाएको छ ।

लिप सी–१० मा १७० किलोवाटको इलेक्ट्रीक मोटर जडान गरिएको छ । यसमा ५२.९ र ६९.९ किलोवाट आवर क्षमताको ब्याट्री प्याक छ । यी दुई मध्ये कुन ब्याट्री अप्सनमा नेपाल आउँछ भन्ने विषयमा हालसम्म टुंगो लागिसकेको छैन ।