रोयल इन्फिल्डले ल्याउँदै छ नयाँ बाइक हन्टर ३५०, होन्डा र जावाका बाइकसँग प्रतिस्पर्धा हुने

रोयल इन्फिल्डले प्रतिस्पर्धात्मक बजारका लागि नयाँ बाइक उपलब्ध गराउने तयारीका साथ कार्य गरिरहेको छ । सो नयाँ बाइकको नाम रोयल इन्फिल्ड हन्टर ३५० राखिएको छ । सो बाइकमा सानो ह्यान्डलबारको साथमा फ्ल्याट फ्युल ट्यांक समावेश गरिएको छ । यसको साथै सो बाइकमा स्पोर्टी राइडिङ पोजिशनको लागि मिड सेट फुटपेग उपलब्ध रहेको छ ।

हाल बजारमा प्रतिस्पर्धाका लागि तयार होन्डा र जावाका बाइकसँग यो बाइकको प्रतिस्पर्धा हुनेछ ।

नयाँ आरई हन्टर ३५० नयाँ मड्युलर जे प्लेटफर्ममा आधारित हुनेछ । बाइकको फ्रन्टमा पारम्पारिक टेलिस्कोपिक फोर्क्स र रियरमा ट्वीन सक उपलब्ध रहेको छ । सो बाइकमा नयाँ ३४९ सीसी, एयरकुल्ड इन्जिन उपलब्ध रहेको छ । सो बाइकमा ब्यालेन्सर साफ्टले लेस हुनेछ जसले बाइकको भाइब्रेसनलाई कम गर्नेछ । नयाँ बाइकको इन्जिनले अधिकतम २० बीएचपीको पावर र २७ एनएमको टर्क जेनेरेट गर्छ ।

नयाँ आरई हन्टर ३५० बाइकमा पुरानै अलोय ह्वील समावेश गरिएको छ । साथै सानो एक्जस्ट, फ्रन्ट मडगार्डको साथमा गोलो हेडल्याम्प र डिस्क ब्रेक समावेश गरिएको छ । नयाँ बाइकमा रोयल इन्फिल्ड बाइकमा राखिएको नयाँ प्रविधि ट्रिपर नेभिगेसन सिस्टमको साथमा ट्वीन पड इन्स्ट्रयुमेन्ट कन्सोल उपलब्ध रहेको छ । बाइकमा ड्युअल च्यानल एबीएस सिस्टम स्ट्यान्डर्ड समावेश गरिएको छ ।

हाल बजारमा रोयल इन्फिल्डको ६५० र ३५० सीसीको बाइक उपलब्ध रहेको छ । भविष्यमा सो बाइकमा केही परिवर्तन गरिने सम्भावना रहेको छ । कम्पनीले हालै मेटियर ३५० क्रुजर बाइक सार्वजनिक गरेको थियो । कम्पनीको सो बाइक नयाँ प्लेटफर्ममा तयार पारिएको हो, साथै यसमा नयाँ इन्जिन समावेश गरिएको छ ।

त्यसैगरी कम्पनीले नेक्स्ट जेनेरेसन क्लासिक ३५० लन्च गर्ने तयारीमा रहेको छ । यसमा मेटियर ३५० मा प्रयोग गरिएको प्लेटफर्म र इन्जिन प्रयोग गरिनेछ ।