सडक सुरक्षा सम्बन्धी समीक्षा बैठक सम्पन्न, मोरक्को सम्मेलन पश्चातको कार्य वारे जानकारी आदानप्रदान

काठमाडौ. – गत फेब्रुअरीमा मोरक्कोमा सम्पन्न सडक सुरक्षा सम्बन्धी मन्त्रिस्तरीय सम्मेलनका सहभागीको समीक्षा बैठक, भौतिक पुर्वाधार तथा यातायात मन्त्रालयमा हिजो बैशाख १४ गते सम्पन्न भएको छ । सो सम्मेलनमा नेपालले सडक सुरक्षाका प्रतिबद्धता जाहेर गरेको थियो ।

मन्त्रालयका सचिव केशव कुमार शर्माको अध्यक्षतामा सम्पन्न सो बैठकमा सम्मेलनका सरकारी, गैर–सरकार तथा पेशागत समुदायका विभिन्न व्यक्तित्वको सहभागिता रहेको थियोे, जहाँ यस विषयमा सम्पूर्ण साझेदारसँग सहकार्यको चर्चा भयो ।

सो अवसरमा विश्व स्वास्थ्य संगठन (डब्लुएचओ) साउथ एशियाका डा. तासी र डब्लुएचओ नेपालका डा. ग्यापो दोर्जी, मन्त्रालयका सह–सचिवहरु सुशिल बाबु ढकाल, कृष्ण राज पन्थ, नेपाल अटोमोबाइल्स एसोसिएसनका कार्यकारी निर्देशक गोविन्द भट्टराई, डा. सुनिल जोशी, स्वतन्त्रता अभियान नेपालकी रितु भट्ट, सडक विभागका शुभराज न्यौपाने, मोटरिङ नेपालका किरण धिताल तथा युथ फर रोड सेफ्टी इन नेपालकी मनिका वम्मा लगायतको उपस्थिति थियो ।

नागरिक समुदायबाट भइरहेका कार्यका वारेमा जानकारी आदानप्रदान गरिएको सो बैठकमा मन्त्रालय अन्तर्गतको सडक सुरक्षा सम्बन्धी कार्य र मिनीस्ट्रियल मिटिङको निष्कर्षको कामको तालमेल र योजना बारेमा छलफल भएको सो बैठकमा मन्त्रालयका अधिकारी तथा सडक सुरक्षा परिषदले गरेका प्रयासबारे प्रकाश पारिएको थियो । दिगो सडक र सुरक्षित यातायातमा नेपाल सरकारसँगैे दातृ निकाय, पेसागत र गैर संरकारी क्षेत्रको साझा प्रयत्न जारी रहको छ ।

हाल नेपालमा मोटरसाइकलको संख्या वढेसँगै दुर्घटना र त्यसको नकारात्मक प्रभाव डरलाग्दो बन्दै गएको परिप्रेक्षमा डब्लुएचओका अधिकारीहरूले गुणस्तरियता र डबल हेल्मेटको आवश्यकता तथा त्यसको सफल कार्यान्वयनमा आफ्नो अनुभव सुनाएका थिए ।

दर्जनौ अभिसन्धि अनुमोदन, प्रतिबद्धता कार्यान्वयन, सडक सुरक्षा ऐन र काउन्सिल, सार्वजनिक यातायातको सुधारमा मन्त्रालय अझ सक्रिय हुनुपर्ने राय बैठकका सहभागीहरुको थियो । सडक सुरक्षा काउन्सिलका सरोज प्रधानद्वारा सहजीकरण गरिएको सो बैठक निकट भविष्यमै साझा राणनीति तयार गर्ने निष्कर्ष साथ सम्पन्न भएको बताइएको छ ।