राइड एन्ड र्याफ्ट सम्पन्न, र्याफ्टिङ गरेर फर्किए राइडरहरु

काठमाडौं – कोरोना भाइरसको प्रकोपका बीच लामो समय बाहिर रमाइलो गर्न नपाएका बाइक राइडरहरु गत शुक्रबार र शनिबार पहिलो पटक रमाइलो गरेर फर्केका छन् ।

पहिलो पटक आयोजना गरिएको राइड एन्ड र्याफ्ट कार्यक्रममा बाइक राइडरहरु त्रिशुली नदीमा र्याफ्टिङ गरेर फर्किएका हुन् । उनीहरु बेलुकी रिभर फन बीच रिसोर्टमा विभिन्न तरिकाले रमाइलो गरेका थिए ।

सो कार्यक्रममा ६० जना भन्दा बढी राइडरको सहभागिता रहेको थियो । सबै ब्रान्डका बाइक राइडरहरुलाई सहभागी गराउने गरी यो कार्यक्रमको आयोजना गरिएको र आगामी दिनमा समेत यसलाई निरन्तरता दिइने आयोजक मध्येका एक प्रमोद श्रेष्ठ गुफीले बताए ।

काठमाडौं लिजेन्ड्सको आयोजनामा भएको सो कार्यक्रमलाई विभिन्न कम्पनीहरुले समेत प्रायोजन गरेका थिए ।