५ वर्षमा ६ लाखभन्दा बढी मेटियर ३५० बिक्री, नेपालमा लोकप्रिय बन्दै

रोयल इनफिल्डले ५ वर्षमा ६ लाख भन्दा बढि मेटियर ३५० बिक्री गरेको घोषणा गरेको छ । नोभेम्वर २०२० मा लन्च भएको यस मोटरसाइकलले विश्व वजारमा आफ्नो प्रभाव विस्तार गर्दै लगेको छ ।

मेटियर ३५० ब्रान्डको जे सिरिज प्लेटफर्म प्रयोग गर्ने पहिलो मोडल समेत हो । उक्त प्लेटफर्मलाई कम्पनीले अहिले क्लासिक ३५०, बुलेट ३५०, हन्टर ३५० र गोआन क्लासिक ३५० जस्ता मोडलमा समेत प्रयोग गर्दै आएको छ ।

यस बाइकमा ३४९ सीसी, एयर र आयल कूल्ड सिंगल सिलिन्डर इन्जिन जडान गरिएको छ, जसले ६,१०० आरपीएममा २०.२ बीएचपी र ४,००० आरपीएममा २७ एनएम टर्क जेनेरेट गर्दछ । इन्जिनलाई स्लिपर क्लच मार्फत ५–स्पीड गियरबक्समा जोडिएको छ ।

मेटियर ३५० मा सेमी डिजिटल इन्स्ट्रुमेन्ट कन्सोल, ट्रिपर नेभिगेसन पोड, एलईडी लाइटिङ, यूएसबी टाइप–सी चार्जिङ पोर्ट र एड्जस्टेवल लिभर जस्ता फिचर पाउन सकिन्छ ।

भारत लगायत विश्वका अन्य देशहरुमा जस्तै नेपाली बजारमा समेत मेटियर ३५० लोकप्रिय बनिरहेको छ । रोयल इनफिल्डको नेपालका लागि आधिकारिक वितरक अल्फा अटोमोटिभ्सले हाल यसलाई नेपालमै एसेम्बल गरी बिक्रीवितरण गरिरहेको छ ।