पल्सर १८० को पुनरागमन, हर्नेट १८० र अपाचेसँग गर्ला प्रतिस्पर्धा

बजाजले पहिले नै बन्द गर्ने औपचारिक घोषणा गरेको पल्सर १८० लाई फेरि बजारमा ल्याएको छ । गत वर्ष सेमी फेयर्ड पल्सर १८०एफ बजारमा ल्याएर पल्सर १८० बन्द गर्ने घोषणा गरिएको थियो । तर फेरि अब पल्सर १८० बजारमा आउने अर्को घोषणा भएको छ ।

पल्सर १८० अब २०२१ को मोडलमा उपलब्ध हुनेछ । यसमा स्प्लिट सिट, ब्ल्याक अलोय ह्विल र फाइभ–वे एड्जस्टेबल नाइट्रोक्स सक एबजर्बर हुनेछ । यसमा उही १७८.६ सीसी, एसओएचसी, टु भल्व इन्जिन हुनेछ जसले १७.०२ पीएसको पिक पावर र १४.५२ एनएमको टर्क जेनेरेट गर्छ ।

भारतमा यसको मूल्य १ लाख ८ हजार भारु तोकिएको छ, जुन पल्सर १५० ट्विन डिस्क भन्दा करिव ३ हजार भारु महंगो हो ।

बजाज पल्सर १८० लाई फेरि बजारमा ल्याउनुको कारण बजाजले प्रेस नोटमार्फत सार्वजनिक गरेको छ । बजाजका अनुसार स्पोर्ट्स बाइकिङ सेगमेन्टमा १८० देखि २०० सीसीका बाइकको २० प्रतिशत बजार हिस्सा छ ।

पछिल्लो समयमा होन्डा हर्नेट १८० र टीभीएसका विभिन्न अपाचे सिरिजले समेत यो सेगमेन्टको बजारलाई बढाइरहेका छन् । त्यसैले बजाजले फेरि पल्सर १८० लाई बजारमा उपलब्ध गराएको बताएको छ ।