पेट्रोलियम पदार्थको मूल्य बढेसँगै विभागले बढायो सार्वजनिक यातायातको भाडा

काठमाडौं – नेपाल आयल निगमले डिजेल र पेट्रोलको मूल्य बढाएसँगै यातायात व्यवस्था विभागले सार्वजनिक यातायातको समेत भाडादर बढेको सूचना सार्वजनिक गरेको छ ।

विभागको पहिलेकै निर्णय अनुसार स्वचालित प्रणाली अनुसार भाडादर बढाइएको हो । यस अनुसार यात्रुवाहक सवारीमा ५.३० प्रतिशत, पहाडी बाटोमा संचालन हुने मालवाहक सवारीमा ६.९४ प्रतिशत र तराईको बाटोमा संचालन हुने मालवाहक सवारीमा ७.७ प्रतिशतको दरले भाडादर वृद्धि गरिएको छ ।

नेपाल आयल निगमले राति १२ः ०० बजेदेखि लागू हुने गरी पेट्रोलियम पदार्थको मूल्य वृद्धि गरेको हो । निगमले गरेको मुल्यवृद्धिअनुसार पेट्रोल प्रतिलिटर रु १९९ र डिजेल–मट्टितेलको मूल्य प्रतिलिटर रु १९२ पुगेको छ ।

निगमले आइतबार राती एक विज्ञप्ति जारी गरी पेट्रोलको साविकको खुद्रा बिक्री मूल्यमा रु २१ ले वृद्धि गरी प्रतिलिटर रु १९९ सय रुपैयाँ तथा डिजेल र मट्टितेलको साविकको खुद्रा बिक्री मूल्यमा रु २७ ले वृद्धि गरी प्रतिलिटर रु १९२ रुपैयाँ कायम गरिएको जनाएको छ ।