पेट्रोलियम पदार्थको मूल्य घटेसँगै घट्यो सार्वजनिक यातायातको भाडा

काठमाडौं – नेपाल आयल निगमले पेट्रोलियम पदार्थको मूल्य घटाएसँगै यातायात व्यवस्था विभागले सार्वजनिक यातायातको भाडादर घटाएको छ ।

विभागको पहिलेकै निर्णय अनुसार स्वचालित प्रणाली अनुसार भाडादर घटाइएको हो । यस अनुसार यात्रुवाहक सवारीमा ५.४१ प्रतिशत, पहाडी बाटोमा संचालन हुने मालवाहक सवारीमा ६.९७ प्रतिशत र तराईको बाटोमा संचालन हुने मालवाहक सवारीमा ७.६८ प्रतिशतको दरले भाडादर घटाइएको छ ।

राति १२ बजेदेखि लागू हुने गरेर सरकारले पेट्रोलको मूल्य प्रतिलिटर २० रुपैयाँ र डिजेल–मट्टितेलको मूल्यमा प्रतिलिटर २९ रुपैयाँ घटाएको हो ।

घटेको मूल्यअनुसार अब उपभोक्ताले प्रतिलिटर १७९ रुपैयाँमा पेट्रोल र १६३ रुपैयाँमा डिजेल–मट्टितेल पाउँछन् । यसअघि, पेट्रोलको मूल्य प्रतिलिटर १९९ र डिजेलको मूल्य प्रतिलिटर १९२ रुपैयाँ थियो । जसमध्ये पेट्रोलमा २० रुपैयाँ र डिजेलमा प्रतिलिटर २९ रुपैयाँ मूल्य कटौती गरिएको हो ।