प्रियंका रानी जोशी बनिन् एमजी एस५ ईभीको ब्रान्ड एम्ब्यासडर

काठमाडौं– एमजी (मोरिस गराजेज) को नेपालका लागि आधिकारिक वितरक प्यारामाउन्ट मोटर्स प्रालिले मिस नेपाल वल्र्ड २०२२ र चर्चित मोडल प्रियंका रानी जोशीलाई एमजी एस५ ईभीको ब्रान्ड एम्ब्यासडरको रूपमा आधिकारिक रूपमा नियुक्त गरेको घोषणा गरेको छ ।

यस सम्झौतासम्बन्धी हस्ताक्षर समारोह भदौ ११ गते, बुधबार प्यारामाउन्ट मोटर्सको काठमाडौंस्थित शोरुममा सम्पन्न भएको हो । यो साझेदारी दुई वर्षका लागि हुनेछ ।

यस साझेदारीमार्फत, प्रियंका नेपालमा एमजी एस५ ईभीको फेस बन्नेछिन् र आगामी दुई वर्षसम्म यसका स्टाइल र इनोभेशनलाई प्रस्तुत गर्नेछिन् । साझेदारीको घोषणा गर्दै, प्यारामाउन्ट मोटर्सका महाप्रबन्धक सुनिल बहादुर क्षेत्रीले भने, ‘प्रियंकाले आत्मविश्वास, शालीनता र आधुनिक गतिशीलताको प्रतिनिधित्व गर्नुहुन्छ । यी गुणहरू एमजी एस५ ईभी र एमजी ब्रान्डसँग पूर्ण रूपमा मेल खान्छन् । हामी उहाँलाई एमजी परिवारमा स्वागत गर्न पाउँदा अत्यन्तै खुशी छौं र सँगै नयाँ दर्शकहरूसम्म पुग्ने अपेक्षा राख्छौं ।’

‘एमजीसँग विशेषतः एमजी एस५ इभीसँग आबद्ध हुन पाउँदा म अत्यन्त उत्साहित छु । एमजी इनोभेशन, पर्फर्मेन्स र सफिस्टिकेशनको प्रतीक हो । प्यारामाउन्ट मोटर्स र एमजीसँगको यो रोमाञ्चक यात्राको लागि मा उत्साहित छु’ प्रियंकाले भनिन् ।

प्रियंका रानी जोशीको ब्रान्ड एम्ब्यासडरको रूपमा सहभागिताले एमजी एस५ ईभीलाई युवा र सवारीप्रेमी दर्शकहरूसँग अझ नजिक ल्याउनेछ, र ब्रान्डको प्रभाव र पहुँच बढाउने कम्पनीको भनाई छ । यस साझेदारीसँगै, प्यारामाउन्ट मोटर्सले नेपालमा एमजी एस५ ईभीको उपलब्धता र यसको आकर्षक डिजाइन, अत्याधुनिक फिचरहरू र शक्तिशाली परफर्मेन्सलाई अझ प्रचार गर्ने लक्ष्य राखेको छ ।