नेपाली बजारमा भित्रियो पावरफुल इन्जिनयुक्त प्युजोको एसयूभी २००८

काठमाडौं – नेपाली बजारमा प्युजोको नयाँ एसयूभी २००८ भित्रिएको छ । नेपालका लागि प्युजोको आधिकारिक वितरक सांग्रिला मोटर्सले फेसलिफ्ट मोडलको सो गाडी भित्र्याएको हो ।

सो गाडीको मूल्य १ करोड २५ लाख रुपैयाँ तोकिएको छ । सो एसयूभीमा १.२ लिटरको टर्बोचार्ज्ड पेट्रोल इन्जिन छ, जसले ५५०० आरपीएममा १३१ एचपी पावर र १७५० आरपीएममा २३० एनएम टर्क जेनेरेट गर्छ । सो इन्जिनमा ६–स्पिड अटोमेटिक ट्रान्समिसन उपलब्ध छ ।

गाडीको लम्बाई, चौडाई र उचाई क्रमशः ४३००, १७७० र १५५० एमएम छ । १९८ किलोमिटर प्रतिघण्टा टप स्पिड रहेको प्युजो २००८ एसयूभीले ९.१ सेकेन्डमा शून्य देखि १०० किलोमिटर प्रतिघण्टा सम्मको गति लिन सक्छ ।

गाडीमा सुरक्षाका लागि ६ वटा एयरब्याग, ईबीडी र बीएस सहितको एबीएस, ट्रयाक्सन कन्ट्रोल, हिल असिस्ट फङ्सन र क्रुज कन्ट्रोल तथा स्पिड लिमिटर आदि उपलब्ध छ । त्यसैगरी प्यानोरामिक सनरुफ, साइड इन्डिकेटर र अटो बिम असिस्ट सहितको फुल एलईडी हेडलाइट, ड्युअल टोन कलर, वायरलेस चार्जिङ प्लेट र रियर क्यामेरा सहितको रियर पार्किङ एड रहेको छ ।

गाडी भित्र विशेष प्रकारको एसी रहेको छ । यसले गाडी भित्र न्यानो वा आवश्यकता अनुसारको वातावरण निर्माण गर्न सकिन्छ । गाडीमा १७ इन्चको अलोय ह्विल र अन्य विभिन्न विशेषता रहेका छन् ।