टीभीएसको नयाँ इलेक्ट्रिक मोटरसाइकलको पेटेन्ट तस्बिर सार्वजनिक

टीभीएसले नयाँ इलेक्ट्रिक मोटरसाइकलको पेटेन्ट तस्बिर सार्वजनिक गरेको छ। आईक्युब स्कुटरमार्फत इलेक्ट्रिक स्कुटर बजारमा २५ प्रतिशत  हिस्सा बनाइसकेको टीभीएस अब परफर्मेन्स ओरिएन्टेड इलेक्ट्रिक मोटरसाइकल सेग्मेन्टमा प्रवेश गर्ने तयारीमा देखिएको छ।

पेटेन्ट तस्बिरअनुसार, नयाँ बाइकमा मिड-माउन्ट गरिएको एयर-कुल्ड मोटर हुनेछ, जसले बेल्ट ड्राइभमार्फत पछाडिको पाङ्ग्रामा शक्ति स्थानान्तरण गर्नेछ। मोटर केसिङ टीभीएस किङ इलेक्ट्रिक रिक्सा जस्तै देखिए पनि यसको संरचना फरक रहनेछ। बाइकमा प्रयोग भएको प्लेटफर्म पूर्णतया नयाँ देखिन्छ।

डिजाइनमा ड्युअल ब्याट्री प्याक सेन्ट्रल स्पाइन फ्रेमको दुबै छेउमा जडान गरिएको छ, जसले तौल सन्तुलन र गुरुत्व केन्द्रको कम स्तर सुनिश्चित गर्छ।

पेटेन्ट तस्बिरमा इलेक्ट्रिक बाइक सिंगल स्विंगआर्म र प्रिलोड समायोज्य अफसेट मोनोशक सस्पेन्सनले सुसज्जित छ। यसले टीभीएसको आगामी इलेक्ट्रिक मोटरसाइकललाई प्रिमियम, रेस-सक्षम मोडलको रूपमा राख्ने सम्भावना बढाउँछ। यसको अगाडि यूएसडी फोर्क हुन सक्छ ।

टीभीएसको अपाचे आरटीआर र आरआर३१० को अनुभव तथा अपाचे आरटीईमा गरिएको परीक्षणको आधारमा, यो नयाँ इलेक्ट्रिक बाइक प्रदर्शनमा पनि सशक्त हुने अपेक्षा गरिएको छ। सो बाइकमा ड्युअल ब्याट्री सेटअपका कारण १२० किलोमिटरभन्दा बढी रेन्ज हुने अनुमान गरिएको छ ।