उमेरले कान्छा कामले खारिएका अध्यक्ष

बुटवल पश्चिम नेपालकै आर्थिक व्यापारिक केन्द्र हो । हरेक सम्भावना बोकेको बुटवल अहिले हाम्रा पहाडका पूर्खा नुन तेल लिन आउने सानो सहर थियो भन्नेमा मात्र सीमित नरहेर त्यतिबेलाको बटौली अहिले बुटवलको रुपमा ठूलो सहर बनिसकेको छ । शिक्षा, स्वास्थ्य, यातायात, बैंकलगायतका क्षेत्रमा राम्रो फड्को मारेको छ ।

यही ऐतिहासिक बुटवलको मैनाबगरमा रहेको अटो भिलेज नेपालकै नमूना अटो भिलेजकै रुपमा परिचित छ । २०५२ सालमा स्थापना भएको अटो भिलेजका ३१ बर्षे कान्छा व्यवसायी हुन् नवनिर्वाचित अध्यक्ष तुल्सीराम न्यौपाने । अटो भिलेजका उनी ११औं अध्यक्ष हुन् । २०४७ सालमा स्याङजा जिल्ला कालिगण्डकी गाउँपालिका वडा नं ५ बाँसटारीमा जन्मेका उनी व्यवस्थापन संकायमा मास्टर अध्यनरत छन् ।

खुमाकान्त न्यौपाने र बसुन्धरा न्यौपानेका ३ भाई छोरा मध्ये माइला छोरा हुन् तुल्सीराम । उनको श्रीमती, एक छोरा र एक छोरी छन् । बुवाको पुस्तादेखि नै अटो व्यवसाय सम्बन्धी फ्युल पम्पमा काम गरिरहदा २०६३ सालमा अध्ययनलाई निरन्तरता दिदै यस क्षेत्रमा प्रवेश गरेका हुन् । उनले अहिले अटो क्षेत्रमा माइको डिजेल्सको नया प्रविधि भित्र्यायर व्यवसाय गर्दै अगाडि बढेका छन् ।

विहान सबेरै देखि आफ्नो पसलबाट सुरु हुन्छ उनको दैनिकी । सानै देखि अटो व्यवसायमा लागेका तुल्सीराम अहिले अटो भिलेजको नेतृत्व लिन पुगेका छन् । उनीसँग अटो भिलेजको राम्रो अनुभव छ । २०५२ सालमा स्थापना भएको अटो भिलेजमा कार्य समिति सदस्य, सचिव हुदै २०७६ सालमा निर्वाचित महासचिव बनेका उनी अहिले बुटवल अटो इन्जिनियरिङ एसोसिएसनको १४औ अधिवेशनबाट दुई उम्मेदवार चन्द्रमणि भन्डारी र प्रेम गौचनलाई पछि पार्दै अध्यक्ष हुन सफल भएका छन् ।

अटो क्षेत्रको विकासमा नयाँ प्रविधि भित्र्यायर लाग्नु पर्छ भन्ने मान्यता राख्ने उनी आफैले हालै मात्र माइको डिजेलका क्षेत्रमा अत्याधुनिक प्रविधि भित्र्यायर अगाडि बढेका छन् । सानै देखि सामाजिक क्षेत्रमा रुचि राख्ने उनी विभिन्न सघं सस्था, संगठन, क्लवमा आवद्ध भई अगाडि बढेका छन् ।

उनको आजको यो सफलतामा परिवार, अटो व्यवसायी, शुभचिन्तकहरुको ठुलो हात रहेको उनको भनाइ छ । निर्वाचनमा तुल्सीराम न्यौपानेको नेतृत्वमा बनेको स्वतन्त्र तथा खुल्ला व्यवसायी प्यानल हो । उनको प्यानलमा रहेका सबै उम्मेदवारले विजय हासिल गरेका कारण उनलाई काम गर्न सजिलो त होला तर पनि यो अटो भिलेजमा रहेका करिव ७ सय व्यवसायीलाई डो-याउन भने पक्कै चुनौती छ ।

‘बुटवल अटो हामी सबै व्यवसायीहरुको साथी, उठाउनु छ हामी सबै व्यवसायी मिलिजुली राजनीति भन्दा माथि’ भन्ने नाराका साथ चुनावी मैदानमा होमिएका अध्यक्ष न्यौपानेलाई यस क्षेत्रको लगानी र व्यावसायिक सुरक्षा, सडक, ढल, नाली, खानेपानी लगायतका अधुरा काम गर्नु पर्नेछ भने फोहोर मैला व्यवस्थापन र पार्किङ स्थलको निर्माण जस्ता महत्वपूर्ण काम पूरा गर्न स्पष्ट योजना र अटो व्यवसायीको साथ र सहयोगको आवश्यकता हुन्छ । हुन त कोरोना संक्रमणको तेस्रो भेरिएन्ट झेल्दै अगाडि बढेको निवर्तमान कार्यसमितिलाई जस्तो चुनौती झेल्न नपर्ला । अनि न्यौपाने नेतृत्वको टिमले अटो क्षेत्रको समस्या पनि नजिकबाट बुझेको छ ।

संस्थामा उमेरले कान्छा, कामले खारिदै आएका नवनिर्वाचित अध्यक्ष न्यौपानेले अटो भिलेजको विकासका लागि स्पष्ट योजना बनाएर अटो व्यवसायी, सरोकारवाला निकायको साथ र सहयोगले पुराना र महत्वपूर्ण काम पूरा गर्ने, व्यवसायीलाई सिपमूलक तालिम, गोष्ठी संचालन गर्ने जस्ता उद्देश्य राखेका छन् । विभिन्न ठाउँमा अटो ग्यारेजहरु खुलिसकेकाले प्रतिस्पर्धाको यो समयमा छिटो छरितो गुणस्तरीय सेवा दिन आवश्यक रहेको उनको बुझाई छ । वास्तवमै बुटवल अटो भिलेजलाई नमूना अटो भिलेज वनाउन यो क्षेत्रमा आधुनिक प्रविधिमैत्री वातावरण र सेवा लिने स्थलका रुपमा विकास गर्न सकिएन भने यहाँका व्यवसायी विस्थापित हुन्छन् भन्ने उनले राम्रैसँग बुझेका छन् ।

दामोदर खनाल/बुटवल