नयाँ पुस्ताको रेनो डस्टर सार्वजनिक, सन् २०२५ मा लन्च हुने संकेत

रेनोले नयाँ पुस्ताको डस्टरको सोल अफ डकार संस्करण पेश गरेको छ । यद्यपि यो एक शो कार हो, जसलाई कम्पनीका प्रमुख कार्यकारी अधिकृतले भविष्यमा शोरुम मोडलका रूपमा ल्याउने सम्भावना व्यक्त गरेका छन् । रेनोको सो एसयूभी २०२५ मा लन्च हुने अपेक्षा गरिएको छ ।

नयाँ डस्टर सीएमएफ-बी प्लेटफर्ममा आधारित छ । सो एसयूभी अफरोडिङ क्षमतालाई ध्यानमा राखेर डिजाइन गरिएको छ । कारमा वाई आकारको एलईडी हेडलाइट, भर्टिकल एयर इनलेट, नयाँ फ्रन्ट बम्पर, स्क्वायर ह्विल आर्च र भी आकारको टेललाइट समावेश गरिएको छ । डस्टर अब ५ र ७ सिटको विकल्पमा उपलब्ध हुनेछ । यसको लम्बाइ ४३४० एमएम र ह्विलबेस २६५७ एमएम छ।

नयाँ डस्टरमा डबल लेयर ड्यासबोर्ड र ७ इन्च र १०.१ इन्चको डिजिटल स्क्रिन दिइएको छ । कारमा वायरलेस चार्जिङ, वायरलेस एन्ड्रोइड अटो र एप्पल कारप्ले, अटोमेटिक क्लाइमेट कन्ट्रोल र अर्कामिस थ्रीडी साउन्ड सिस्टम जस्ता प्रिमियम फिचर हुनेछ । सेफ्टीका लागि यसमा अटोमेटिक इमरजेन्सी  ब्रेकिङ र एडास जस्ता उन्नत फिचर हुनेछ ।

नयाँ डस्टरमा १.३ लिटर टर्बो पेट्रोल, १.०-लिटर टर्बो पेट्रोल र १.२-लिटर हाइब्रिड पेट्रोल इन्जिन गरी तीन वटा इन्जिन विकल्प दिइने सम्भावना रहेको छ । यसको १.३ लिटर टर्बो पेट्रोल इन्जिनले १५४ बीएचपी र १.२ लिटर हाइब्रिड पेट्रोल  इन्जिनले १७० बीएचपी र २०० एनएम पावर जेनेरेट गर्नेछ ।  सो इन्जिनलाई ५ स्पिड गियरबक्समा ट्युन गरिनेछ ।

नयाँ रेनो डस्टरको मूल्य लगभग २० लाख भारु हुने अपेक्षा गरिएको छ र यसले भारतीय बजारमा हुन्डाई क्रेटा, किया सेल्टोस, टाटा ह्यारियर, स्कोडा कुशाक र मारुती ग्रान्ड भिटारा जस्ता एसयूभीसँग प्रतिस्पर्धा गर्नेछ ।