नयाँ जेनेरेसनमा आयो ब्रेजा : पहिलो पटक इलेक्ट्रिक सनरुफ र अन्य धेरै फिचर

नेपाली बजारमा समेत लोकप्रिय सुजुकीको भिटारा ब्रेजा नयाँ डिजाइन एलिमेन्ट्स र इलेक्ट्रिक सनरुफ सहित भारतमा आज सार्वजनिक गरिएको छ । अब यो ब्रेजा नाममा मात्र आउने छ । यसको मूल्य ७ लाख ९९ हजार देखि १३ लाख ९६ हजार भारु सम्म तोकिएको छ ।

ब्रेजामा १.५ लिटर के१५सी पेट्रोल इन्जिन छ, जसले १०३ एचपी पावर र १३६ एनएम टर्क जेनेरेट गर्छ । यसको म्यानुअल भेरिएन्टले २०.१५ र अटोमेटिक भेरिएन्टलदे १९.८० किलोमिटर माइलेज दिने दावी गरिएको छ । यो कार प्याडल सिफ्टर सहित ५–स्पिड म्यानुअल र ६–स्पिड अटोमेटिक गियरबक्समा आउने छ ।

सुरक्षाका लागि यसमा स्ट्यान्डर्डको रुपमा ड्युअल एयरब्याग हुनेछ भने जेडएक्सआई प्लस भेरिएन्टमा ६ एयरब्याग हुनेछ । त्यसैगरी हिलहोल्ड असिस्ट सहित स्ट्यान्डर्ड इलेक्ट्रोनिक स्टेबिलिटी प्रोग्राम अर्थात ईएसपी हुनेछ । नयाँ बडी कलर, रिडिजाइन गरिएको ग्रिल, ट्विन सी–सेप्ड डीआरएल सहितको न्यु अल–एलईडी हेडल्याम्प, एलईडी टेलल्याम्प, न्यु ड्युअल टोन अलोय ह्विल आदि यसमा भएका फिचर हुन् ।

मारुती सुजुकी ब्रेजा इलेक्ट्रिक सनरुफ भएको पहिलो मारुती कार बनेको छ । त्यसैगरी यसमा एचयूडी अर्थात हेड्स–अप डिस्प्ले पनि छ, जसमा स्पिड, आरपीएम लेवल, फ्युल इकोनोमी र अन्य विभिन्न जानकारी डिस्प्ले हुन्छ ।

पहिलो पटक सन् २०१६ को अटो एक्सपोमा सोकेश गरे पश्चात नै धेरै ग्राहकको मन जित्न सफल भएको भिटारा ब्रेजामा अब भिटारा शब्द हटाएर ब्रेजा मात्र राखिएको हो ।

यसको आकार पहिलेकै जस्तो छ, तर उचाई भने ४५ एमएम बढी छ । ग्लोबल सी प्लेटफर्ममा तयार गरिएको ब्रेजा म्यानुअल र अटोमेटिक गरी १० भेरिएन्टमा उपलब्ध हुनेछ । यसमा एलएक्सआई, भीएक्सआई, भीएक्सआई (ओ), जेडएक्सआई, जेडएक्सआई (ओ) र जेडएक्सआई प्लस हुनेछन् ।

यसमा दुई ब्ल्याक ग्रिलका साथै नयाँ डिजाइनयुक्त बम्परमा नयाँ फगलाइट हाउजिङ र सिल्भर स्किड प्लेट छ । यसमा ह्विल आर्च पनि चौडा बनाइएको छ । पहिलेको मोडल भन्दा केही फराकिलो क्लेडिङ छ । त्यसैगरी ठूलो क्वाटर ग्लास, पहिले भन्दा ठूलो रुफरेल र सार्क फिन एन्टेना छ ।

पछिल्लो भागमा एलईडी टेललाइट र ब्रेजा लेटरिङ छ । यसको बम्परमा परिवर्तन गरी सिल्भर स्किड प्लेट दिइएको छ ।

यसमा पहिले भन्दा राम्रो ड्यासबोर्ड छ र मध्य भागमा ब्राउन इन्सर्ट दिइएको छ । त्यसैगरी ९ इन्चको टचस्क्रिन इन्फोटेनमेन्ट सिस्टम र फ्ल्याट बटम स्टेयरिङ छ । त्यसैगरी ३६० डिग्री क्यामेरा, अटोमेटिक क्लाइमेट कन्ट्रोल, १२ भोल्टको सकेट र पुस स्टार्ट स्टप बटन छ ।