चीनमा ईभी र हाइब्रिड कारको बिक्री दर ५० प्रतिशत पुग्यो

विश्वको सबैभन्दा ठूलो अटो बजार चीनमा ईभी र हाइब्रिड कारको बिक्री दर ५० प्रतिशत पुगेको छ । मिडिया रिपोर्टका अनुसार चीनमा पहिलोपटक ईभी र हाइब्रिड कारको मासिक बिक्री दर ५० प्रतिशत पुगेको हो । गत जुलाईमा बिक्री भएको कुल प्यासेन्जर कारमा ईभी र हाइब्रिड कारले ५० प्रतिशत भन्दा बढी योगदान दिएको रिपोर्टमा उल्लेख छ ।

चाइना प्यासेन्जर कार एसोसिएसनको तथ्यांक अनुसार न्यू इनर्जी भेइकलले गत वर्षको जुलाई महिनाको तुलनामा ३७ प्रतिशत बढि बिक्री हासिल गर्दे कार बिक्रीको ५०.७ प्रतिशत हिस्सा ओगटेको हो ।

ईभी आपूर्तिमा ठूलो लगानीले चीनमा घरेलु ईभी उद्योगको द्रुत बृद्धि भएको रिपोर्टमा उल्लेख गरिएको छ । ३ वर्षअघि मात्रै चिनियाँ बजारमा गाडीको कुल बिक्रीको ७ प्रतिशत हिस्सा न्यू इनर्जी भेइकलले लिएको थियो ।

गत जुलाईमा मात्रै प्योर इलेक्ट्रिक कारको बिक्री १४.३ प्रतिशतले बढेको छ । जवकी जुन महिनामा उक्त बृद्धिदर जम्मा ९.९ प्रतिशत मात्रै थियो । चीनपछिको दोस्रो ठूलो अटो बजार अमेरिकामा भने ईभीको बिक्री दर जम्मा १८ प्रतिशत मात्रै छ ।