नागढुङ्गा सुरुङमार्गको टोल शुल्क निर्धारण, कुन सवारी साधनलाई कति ?

काठमाडौँ–सरकारले नागढुङ्गा सुरुङमार्ग प्रयोग गर्ने सवारी साधनका लागि उपभोग दस्तुर (टोल शुल्क) निर्धारण गरेको छ । भौतिक पूर्वाधार तथा यातायात मन्त्रालयले बिहीबार नेपाल राजपत्रमा सूचना प्रकाशन गर्दै सवारी साधनको वर्गीकरण अनुसार शुल्क तोकेको हो ।

राजपत्रमा प्रकाशित सूचना अनुसार काठमाडौं उपत्यकाबाट बाहिरिनेभन्दा काठमाडौँ भित्रिने सवारी साधनले बढी शुल्क तिर्नुपर्ने व्यवस्था गरिएको छ । सरकारले मन्त्रिपरिषद्को निर्णय अनुसार सडक बोर्ड ऐन, २०५८ को दफा ६ को उपदफा (१) ले दिएको अधिकार प्रयोग गरी उक्त दस्तुर लागु गरेको हो ।

मन्त्रालयले सवारी साधनलाई ४ वर्गमा विभाजन गरेर शुल्क निर्धारण गरेको छ । पहिलो वर्गमा कार, भ्यान, पिकअप, ट्याक्टर, माइक्रो बस र अन्य हलुका सवारीलाई राखिएको छ । यस्ता सवारी साधनले काठमाडौं प्रवेश गर्दा ६५ रुपैयाँ र काठमाडौंबाट बाहिरिँदा ६० रुपैयाँ तिर्नु पर्नेछ ।

दोस्रो वर्ग अन्तर्गत मिनी बस, मिनी ट्रिपर÷ट्रक रहेका छन् । यी सवारी साधनले काठमाडौँ प्रवेश गर्दा ११५ रुपैयाँ र काठमाडौंबाट बाहिरिँदा ८० रुपैयाँ तिर्नु पर्नेछ । तेस्रो वर्गमा सिङ्गल रियर एक्सलयुक्त बस, ट्रक रहेका छन्। यी सवारीहरूलाई काठमाडौँ प्रवेश गर्दा २६० रुपैयाँ र काठमाडौंबाट बाहिरिँदा २०० रुपैयाँ शुल्क निर्धारण गरिएको छ । चौथो वर्गमा मल्टी एक्सल ट्रक र भारी उपकरण रहेका छन् । यी सवारीले काठमाडौं प्रवेश गर्दा ६०० रुपैयाँ र काठमाडौंबाट बाहिरिँदा २५० रुपैयाँ शुल्क तिर्नुपर्छ।