नागढुंगा–नौबिसे सडकमा थप ५ दिन सवारी आवागमन बन्द

काठमाडौं। नागढुंगा–नौबिसे सडक खण्डमा मर्मत तथा सुधार कार्य अझै जारी रहने भएपछि आगामी पाँच दिनसम्म सवारी आवागमन बन्द गरिने भएको छ। नागढुंगा–मुग्लिङ सडक आयोजनाको पूर्वी खण्डले आइतबार एक सूचना जारी गर्दै जेठ २६ गतेदेखि ३० गतेसम्म दैनिक साढे ४ घण्टा सडक पूर्णरूपमा बन्द हुने जानकारी दिएको हो।

यस अनुसार आज देखि यो सडक दैनिक बन्द हुनेछ । तोकिएको अवधिमा हरेक दिन बिहान १०:३० बजेबाट दिउँसो ३ बजेसम्म उक्त सडकखण्डमा सवारीसाधन सञ्चालनमा रोक लगाइनेछ।

आयोजनाका अनुसार काठमाडौंबाट नौबिसेतर्फ जाने सवारीसाधनलाई नागढुंगा चेकपोस्टमै रोकिने व्यवस्था गरिएको छ भने नौबिसेबाट काठमाडौंतर्फ आउने सवारीलाई खानीखोला बजारमै रोकिनेछ। साना र मझौला सवारी साधनका लागि वैकल्पिक मार्गका रूपमा सीतापाइला–रामकोट–धार्के र सामाखुसी–टोखा–छहरे–त्रिशूली (विदुर)–गल्छी सडक प्रयोग गर्न सकिने व्यवस्था गरिएको छ ।

यसअघि पनि यही सडकखण्ड जेठ १० गतेदेखि २५ गतेसम्म बन्द गरी मर्मत कार्य गरिएको थियो। सडक सुधार कार्यको प्रभावकारी कार्यान्वयनका लागि यो निर्णय गरिएको आयोजनाले जनाएको छ।