विराटनगरमा खुल्यो मल्टी ब्रान्ड टु ह्विलर सर्भिसका लागि नेपालकै पहिलो स्पिड फोर्स

विराटनगर – हरेक ब्रान्डका दुईचक्के सवारीसाधनहरुको भरपर्दो सर्भिसका लागि विराटनगरमा स्पिड फोर्स सर्भिस सेन्टर सञ्चालनमा आएको छ ।

विराटनगर–४ स्थित बरगाछीमा आइतबार देखि उक्त सर्भिस सेन्टर सञ्चालनमा आएको हो । हरेक ब्राण्डका दुईचक्के सवारीसाधनको सर्भिसिङ र स्पेयर पार्ट्स एकैठाउँमा उपलब्ध गराउने लक्ष्यका साथ कुल १५ लाखको लगानीमा सो सर्भिस सेन्टर सञ्चालनमा ल्याइएको हो ।

भारतबाट आएका स्पिडफोर्स सर्भिसका निर्देशकद्वय निरव भट्ट र दिपेन बराई तथा केशरीचन्द भवरलाल एन्ड कम्पनी प्रालिका प्रबन्ध निर्देशक प्रशान्त तातेडले संयुक्त रुपमा सर्भिस सेन्टरको उद्घाटन गरे ।

भारतका २२ राज्य र ३५ सहरमा १३५ आउटलेट स्थापना गरिसकेको स्पिड फोर्सको यो नेपालमा पहिलो आउटलेट हो ।

हाल नेपाली बजारमा आइरहेका एड्भान्स फिर्चसका बजाज, टीभीएस, हिरो, होन्डा र बुलेट लगायतका बाइकहरुको गुणस्तरीय सेवा र एकल समाधानका लागि स्पिड फोर्स सञ्चालनमा ल्याइएको सर्भिस सेन्टरका सञ्चालक प्रशान्त तातेडले बताए ।

पिकअप एण्ड ड्रप, बिमा नवीकरण, टु व्हीलर रिसेल, फ्री आयल चेन्ज, स्पेयर पार्ट्समा बिशेष छुट र वार्षिक मर्मत लगायतका प्याकेजहरु सहित सर्भिस सेन्टर सञ्चालनमा ल्याइएको उनले जानकारी दिए । विभिन्न ब्राण्डका बाइकहरुका लागि विभिन्न सर्भिस सेन्टर भौतारिनुपर्ने बाध्यतालाई अन्त्य गर्न स्पिड फोर्स प्रभावकारी साबित हुने उनको भनाइ छ ।

सर्भिस सेन्टरबाट प्रवाह हुने सेवालाई थप भरपर्दो बनाउन कम्पनीले स्पिड फोर्स नामक एन्ड्रोइड एप पनि सञ्चालनमा ल्याएको छ । एपमार्फत बाइक सर्भिसको नोटिफिकेसन र यसअघि बाइकमा गरिएका मर्मतको पुर्ण विवरण हेर्न सकिने जनाइएको छ । उक्त एप प्ले स्टोरबाट डाउनलोड गर्न सकिन्छ ।