जफत गरिएका २०२ थान बाइक लिलामी गर्दै मोरङ प्रहरी

विराटनगर–जिल्ला प्रहरी कार्यालय मोरङले आफ्नो मातहतका कार्यालयहरूमा रहेका २०२ थान पुराना तथा जफत गरिएका मोटरसाइकल र स्कुटर लिलाम बिक्री गर्ने भएको छ ।

जिल्ला प्रहरी कार्यालय मोरङ (प्रबन्ध शाखा)ले आज गोरखापत्र दैनिकमा २१ दिने सार्वजनिक सूचना जारी गर्दै यससम्बन्धी प्रक्रिया अघि बढाएको हो ।

प्रहरी कार्यालयका अनुसार लिलाम प्रक्रियामा सहभागी हुन इच्छुक इजाजतप्राप्त कम्पनीहरूले २१ दिनभित्र बोलपत्र फाराम खरिद गरी आवेदन दिन सक्नेछन् ।

बोलपत्र फाराम खरिद गर्नका लागि कार्यालयको कोड नम्बर ३१४०४१३१० र राजस्व शीर्षक नम्बर १४२२९ मा दुई हजार रुपैयाँ राजस्व जम्मा गरेको सक्कल बैंक भौचरसहित जिल्ला प्रहरी कार्यालय मोरङको प्रबन्ध शाखामा सम्पर्क राख्न अनुरोध गरिएको छ ।

सूचना प्रकाशित भएको मिति (२०८१ जेठ २७ गते) ले २१ औँ दिनभित्र तोकिएको प्रक्रिया पूरा गरी बोलपत्र बुझाउनुपर्ने कार्यालयले जनाएको छ ।

विभिन्न समयमा बरामद गरिएका वा बेवारिसे अवस्थामा फेला परी कानुनी प्रक्रिया पूरा भएका यी सवारी साधनहरूलाई नियमअनुसार लिलाम गर्न लागिएको हो ।